Цас цэвэрлэгээний машины хажуугаараа харуулдаж унасан зурагтай явган шог, ёгт ёжлол цахимаар нилээдгүй тархлаа. Нийслэлээс Хот тохижилтын газар ОНӨААТҮГ-т хүлээлгэн өгсөн 28 цэвэрлэгээний машин нь эхнээсээ цастайгаа онхолдож, замын хажууд хэвтэж байгаа пост олон нийтийн анхаарлыг татаж, цаашлаад энгийн иргэд энэ машины үнэ өртгийг сонирхон судалж, тоо баримтыг ухаж эхлэв. Нимгэн цасыг цэвэрлэх, давс нунтаг тараагчтай эдгээр машины нэг бүр нь 125 сая төгрөгийн өртөгтэй, нийт 3.5 тэрбум төгрөгийн худалдан авалт болсон байна. Гэтэл Taoboa.com, Alibaba.com болон Bgclean.co.uk зэрэг сайтуудаас 18-25 мянган ам. Доллар буюу 63-87 сая төгрөгийн үнэ ханштай байгааг зарим сонор иргэд, ухаж төнхсөөр гаргаад иржээ.  Өөрөөр хэлбэл, 3,5 тэрбум төгрөгөөр ижил зориулалттай 50 машин авах боломжтой байж. Дээрх машинуудын хамгийн сүүлийн үеийн загварууд 43-48 мянган ам.доллар буюу 160 хүртэлх сая төгрөгийн үнэтэй худалдааны сайтуудад борлуулагдаж байгаа юм байна. 
 Нийслэлийн төсвийн хөрөнгөөр Хот тохижилтын газар ОНӨААТҮГ-ын захиалгаар дөрвөн тэрбум төгрөгийн тендер шалгаруулалтыг өнгөрсөн оны гуравдугаар сарын 10-нд захиалсан байна. Тендер шалгаруулалтаар “Батсээр” ХХК нийлүүлэлт хийхээр болжээ. Ингээд тусгай зориулалтын зам цэвэрлэгээний машин маневр сайтай, дизель хөдөлгүүртэй жижиг учир хөдөлгөөнд саад учруулдаггүй, талбайн нарийн ширхэгт хог хаягдлыг сайн авдаг гэдгээр нь тухайн машиныг авсан гэдгээ тухайн компанийн зүгээс тайлбарласан байна. 
Мөн эдгээр машинууд нь БНХАУ-д Герман улсын лицензээр үйлдвэрлэсэн, бичил оврын төхөөрөмж бөгөөд үнийн хувьд олон үйлдзэлтэй тусгай зориулалттай гэдгээрээ тээврийн зардал, нийлүүлэлтийн хувь зэрэг ороод нэгж бүр нь 125 сая төрөг болсон гэж нийлүүлэгч компани тайлбарлажээ.  Гэсэн ч жижиг оврын эдгээр машин цас ихтэй, зам муутай нийслэлийн өвлийг барах уу. Өртөг өндөртэй машинууд нь хаврын урьныг үзэлгүй зам дээр хажуулдсаар үргүй зардал болох вий гэсэн санаа зовнил олон нийтийн дунд байна.