Нисэх-Яармаг-Энхтайваны гүүр чиглэлийн замын нэгдүгээр эгнээг нийтийн тээвэр саадгүй зорчих болгох үүднээс хайсаар тусгаарлах туршилтын ажлыг хийж буй. Ингэснээр түгжрэл тодорхой хэмжээнд саарч, нийтийн тээврийн хурд нэмэгдэж, хувийн унаанаас татгалзах иргэд ихсэх үр дүнтэй болохыг албаныхан онцолсон. Тэгвэл 950 гаруй сая төгрөгийн үнэлгээтэй нийт 12 мянган метр урт хашааг замын нэгдүгээр эгнээг тусгаарлаж тавьсныг иргэд эсэргүүцэж байна. Түгжрэл бууруулах нэрийдлээр тусгаарлах хайс, хашаа байршуулж, туршилт гэж төсвийн хөрөнгийг үргүй зарахын оронд бодитой ажил хийхийг иргэд албаныхнаас шаардаж байгаа юм. Тодруулбал, нэг тэрбумын үнэлгээтэй тусгаарлалтын хашаанаас илүү бодит ажил хийхийг түгжрэлийн үндэсний хороо болон нийслэлээс иргэд шаардаж байна. Харин нэгэнт эхэлсэн ажлыг зогсоохгүй бөгөөд туршилтыг цаашид албажуулж, нэгдүгээр эгнээг тусгаарлах ажлыг сайжруулж, камержуулалтыг нэмэгдүүлж, зорчих хөдөлгөөнд саад учруулсан иргэд, жолоочдод хариуцлага тооцохоо албаныхан онцолсон.