Сээрний яс хуга цохиж, эр бяраа гайхуулсан эрчүүд зарим бүсгүйчүүд болоод хүүхдүүд хүртэл их болсон. Тэгвэл эв аяыг нь тааруулж чадаагүйгээс гарын ясаа хугалж бэртээсэн иргэд ГССҮТ-д их ирэх болжээ. Сээрний ясыг гараараа цохих нь шууд утгаараа ясыг ясаар цохиж байгаа хэрэг бөгөөд мэдээж аль нэг яс нь хугарна. Тухайн цохиж байгаа хүн хэрвээ ясаа хугалж гэмтээвэл хамгийн эрсдэлтэй гэж мэргэжлийн хүн талбарласан байна. Эдгэхдээ яс буруу бороолж эдгэвэл, гар мурий тахир болж үлдэхээс гадна хэрвээ зөөлөн эд гэмтвэл хаван хавдар үүсч, нян бактери үүснэ. Цаашлаад гараа тайруулах хүртэл эрсдэлтэй гэжээ. Ингэж  ямар нэг гадны шалтгаангүй, өөрөө өөрийгөө бэртээх нь залуу хүмсүүсийн хувьд цаашид хөдөлмөр эрхлэхэд хүртэл хүндрэлтэй хохирол юм гэж сэрэмжлүүлсэн байна. Тэгвэл сээрийг яагаад цохидог вэ? Монголчууд өвлийн идэшт үхэр төхөөрвөл сээрийг нь чанаж, мөлжөөд хуга цохьдог уламжлалтай. Зарим нутагт эрчүүд   хоорондоо мөрий тавьж сээрний яс хуга цохин эр бяраа гайхуулах нь бий. Бүр цаашлаад эр хүний эзэмших 9 дадал чадварт сээр хуга цохих чадвар ордог байжээ. Энэ нь дайн байлдааны үеэр дайснаа сэлмээр оновчтой цохих дадал болдог, баатар эрсийн болзошгүй тулалдаанд бэлтгэх, бие бялдраа хөгжүүлэх дасгал сургуулилтын нэг болдог байж. Монголчууд ах дүүсээрээ цуглан, өвлийн үүцээ хийж, үхрийн 12 сээрийг хамгийн эхний махтай хамт чанаад хувааж идэн, эрчүүд сээрийг нь хуга цохьдог заншилтай байжээ. Энэ нь тухайн жилийн өвлийн идэш болсон үхрийн сүнсийг амирлуулж, хойд төрөлд нь оруулж байгаа гэсэн нэг төрлийн дом ажээ.