ОХУ-ын Вагнер хувийн цэргийн компанийн удирдагч Евгений Пригожин наймдугаар сарын сүүлээр онгоцны ослоор нас барсан. АНУ болон барууны бусад орны албан тушаалтнууд “New York Times”-д дотор нь үүссэн дэлбэрэлтээс болж онгоц сүйрсэн байх магадлал өндөр гэж хэлсэн билээ. Тэгвэл ОХУ-ын ерөнхийлөгч Владимир Путин Вагнерын удирдагчдын хэн нэг нь санамсаргүй гар бөмбөг асаасны улмаас онгоц сүйрсэн байж магадгүй гэжээ. Тэрбээр “ОХУ-ын мөрдөн байцаах хорооны дарга амь үрэгдэгсдийн цогцсоос гар бөмбөгний хэлтэрхий олдсон гэж надад хэлсэн” гэсэн юм. Дээрээс нь онгоц дээр Вагнерын удирдлагууд мансуурсан эсвэл согтууруулах ундаа хэрэглэсэн байх магадлалтай гэсэн утгатай зүйл Путин ярьсан байна.
Ингэхдээ тэрбээр Пригожин болон бусад есөн хохирогчийн биед архи, мансууруулах бодисын шинжилгээ хийгээгүйг шүүмжилжээ. Путин “Мөрдөн байцаалтын ажил дуусаагүй байгаа. Цусанд нь архи, мансууруулах бодис байгаа эсэх нь тогтоогдоогүй, харамсалтай нь тийм шинжилгээ хийгээгүй юм. Ослын дараа ФСБ Санкт-Петербург дахь Вагнерын оффисоос 10 тэрбум рубль мөн 5 кг кокэйн олсон хэр нь шинжилгээ аваагүй байна. Миний бодлоор бол кокэйн олдсон олдоогүй мансууруулах бодис илрүүлэх шинжилгээ хийх ёстой” гэж хэлжээ.