Хөгжлийн банкны асуудлаар нотлох баримт шинжлэн судлах сонсгол үргэлжилж, 11 компанийн Хөгжлийн Банкны зээлийн асуудалд 65 гэрчийг оролцуулсан хэлэлцүүлэг өрнөж байна. Энэ үеэр "Бэрэн" группийн авсан зээлийн зарцуулалттай холбоотой асуултад гэрчээр оролцож буй "Бэрэн групп" ХХК-ийн гүйцэтгэх захирал Цэлмэг хариуллаа. Тэрбээр "2020 оны хоёрдугаар сараас хойш АТГ-т Хөгжлийн Банкнаас авсан зээлийн зарцуулалттай холбоотой асуудалд компанийнхаа санхүүгийн бүхий л тайлан, баримт бичгийг өгөөд компанийнхаа зарцуулалтыг нотлоод яваа. Бид хуульчидтайгаа зөвлөлдсөн ба зарцуулалтын талаарх асуултын хүрээнд бид нэгбүрчлэн хариулт өгөх нь хуулийн хүрээнд ямар ч боломжгүй гэдгийг хэлье. Яагаад гэвэл хууль хяналтын байгууллагад нууцын зэрэглэлтэй гээд баталгаа гаргаад гарын үсэг зурчихсан. 
 

"Бэрэн" группийн барилгатай холбоотой манай зээлийн зарцуулалтыг асуулаа. Нэг бүрчлэн хариулах боломжгүй тул зарчмын хувьд асуултад хариулъя.
 

Тухайн оныхоо дөрөвдүгээр сард бид Хөгжлийн Банкнаас нийгмийн шинжтэй гэр хорооллын дахин төлөвлөлтийн Ё блок гэж 720 айлын орон сууц барихаар зээлийн хүсэлт гаргаад тухайн жилийнхээ арваннэгдүгээр сард Зээлийн хороо буюу ТУЗ-өөс нь зөвшөөрч зээлийн гэрээ байгуулаад, олголтоо үе шаттайгаар авсан.
Мөнгийг хаашаа орж, гарч байгаагаар нь биш тухайн төсөлдөө тухайн хэмжээний мөнгийг зарцуулсан уу гэдэг өнцгөөс асууж яваагүй болохоор бид шинжээчийн дүгнэлттэй санал нийлэхгүй байна. Ямар ч байсан авсан зээлээ барилга болон гангийн үйлдвэртээ зарцуулсан гэдгийг зарчмын хувьд хэлье” гэв.