УИХ-ын гишүүн О.Цогтгэрэл Ковидын сонсголтой холбоотойгоор мэдээлэл хийлээ.

Тэрбээр "Зургаадугаар сарын 26-нд Эдийн засгийн байнгын хорооноос Ковидын үеийн цар тахлын төсвөөр сонсгол хийх шийдвэр гарсан билээ. УИХ-ын есөөс дээш гишүүн санал гаргаж байж, УИХ-ын чуулганаар сонсголыг хэлэлцэх юм. Миний бие орсон нийт таван гишүүнтэй ажлын хэсэг байгуулагдаж, ажилласан. Монголбанкны ерөнхийлөгч, ХЭҮК гэх мэт Засгийн газрын болон УИХ-ын харьяа 18 байгууллага руу 23 албан бичиг явуулж, материалууд авахыг хүссэн. Улмаар шинжээч томилуулж, сонсголыг хийх ёстой байсан юм. Гэсэн хэдий ч материал дутуу байна. Зарим сайд руу гурван удаа материал явуулсан. Холбогдох бүхий л бичиг баримтыг өгөхгүй байна. Гэтэл өнгөрсөн долоо хоног шинжээч томилуулах гэтэл байнгын хорооны ирц бүрдээгүй шалтгаанаар хуралдаагүй. 10-20 их наяд төгрөгийн мөнгөн дүн бүхий асуудлыг тоохгүй орхиж, чанаргүй сонсгол хийлгэхээр санаатайгаар нөлөөлж байна. Шинжээч томилж өгөхгүй бол Ковидын үеийн сонсголыг хойшлуулах хэрэгтэй гэх асуудал дээр байнгын хороон дээр асуудал үүслээ. Ажлын хэсгийн таван гишүүн хуралдаж, шинжээчээ томилбол албан ёсных биш болно" хэмээлээ.

Үргэлжлүүлэн тэрбээр "С.Чинзориг сайд "Бүхий л холбогдох бичиг баримтыг явуулсан учраас шинжээчгүй байсан ч сонсголыг хийгээч" гэсэн. Сайдын зүгээс олон нийтийн мэддэг, албан сайтад байдаг тоон статистик мэдээллийг л хуулаад явуулсан байна. Ногоон автобус, нүүрсний хулгай шиг тендерийн хууль үйлчлэхгүйгээр, Ковидын үед шууд худалдан авалт хийсэн. Иргэдийн мэдэх ёстой олон асуудалд хамаарах бичиг баримтыг ерөөс өгөхгүй, нарийн мэдээлэл байхгүй байна. Ерөнхий мэдээлэл л явуулж байна.

Нэгт, Шинжээч байхгүй бол хувь өөрсдийн байр сууриа илэрхийлэхээс хэтрэхгүй. Нарийн судалж, задалсан, баталгаат эх сурвалжгүй болно гэсэн үг.

Хоёрт, байнгын хороо хуралдаж, сонсголын товыг өөрчлөх боломжтой. Гэвчиг өөрчлүүлэхгүй гэх асуудал үүсэж байна. Хойшлуулахгүй юм бол шинжээчийг томилж өгөх хэрэгтэй.

Ковидын үеийн хулгайг нуун дарагдуулж, чанаргүй сонсгол хийлгэх гэж байна. Хэрэв сонсголыг явуулаагүй бол Ардчилсан намын буруу болно. Энэ сарын 23, 24-ний өдрүүдэд сонсголыг зохион байгуулахгүй. Хангалттай хэмжээний материалаа бүрдүүлж, шинжээч авч ажиллуулсны дараагаар сонсгол явуулах өдрийг товлоно. Гурван шинжээчийг хоёр долоо хоногийн хугацаанд л ажиллуулах хүсэлтэй байгаа. Харин Хөгжлийн банкны асуудлаар хэдэн шинжээчид хэр их зардал гаргасныг судалж үзээрэй. Эрх баригчид хэрхэн зохион байгуулалттайгаар хэргийг нуун дарагдуулж болдгийг харуулсан жишээ болж байна" гэв.