Цагдаагийн байгууллагад энэ оны 08 дугаар сарын 10-наас 11-нд шилжих шөнө Өвөрхангай аймгийн Арвайхээр сумын нутаг дэвсгэрт “Зам тээврийн ноцтой осол гарсан” гэх дуудлага, мэдээлэл бүртгэгдсэн юм.
Дуудлага, мэдээллийн дагуу тус аймгийн цагдаагийн газрын алба хаагчид шалгалтын ажиллагаа явуулахад “Toyota” маркийн тээврийн хэрэгслийн жолооч “И” нь явган зорчигч 57 настай, эрэгтэйг мөргөж, амь насыг нь хохироожээ.
Хэргийг сануулахад, Улаанбаатар хотоос орж ирж явсан “Ланд круйзер-200”маркийн автомашин, Ховд аймгаас Улаанбаатар хотын чиглэлд явж байсан автобусны зорчигчийг "Хурд" шатахуун түгээх станцын дэргэд мөргөсөн.
Дээрх үйлдэлд Тээврийн цагдаагийн албаны Мөрдөн шалгах газраас иргэн “И”-д холбогдуулан Эрүүгийн хуулийн 27.10 дугаар зүйлийн 3 дахь хэсэгт зааснаар энэ оны 08 дугаар сарын 29-ний өдөр эрүүгийн хэрэг үүсгэн, яллагдагчаар татаж, хэргийг 10 дугаар сарын 18-ны өдөр шүүхэд шилжүүлэх саналтай прокурорт шилжүүлэв.
Амь хохирогч “тамхи татна” гэж автобуснаас буугаад ийнхүү автомашинд дайруулж нас барсан юм. Хэрэг болсны дараа Өвөрхангай аймгийн засаг дарга А.Ишдорж "Осол гарах үеэр би архи согтууруулах ундааны зүйл огт хэрэглээгүй, зүүрмэглэж нойрмоглоогүй явсан. Үзэгдэх орчин хязгаарлагдсан орон зайд, харанхуй шөнө энэ явдал болсон.

Хүн бүр хуулийн өмнө адил тэгш эрхтэй, бас үүрэгтэй. Ийм нөхцөл байдал үүссэн үед “сандал суудал”-тайгаа зууралдалгүйгээр ёс зүйгээ дээдлэн Өвөрхангай аймгийн Засаг даргын үүрэгт ажлаа хүлээлгэн өгөхөөр Монгол Улсын Ерөнхий сайдад хүсэлтээ гаргасан бөгөөд хэргийг холбогдох хууль журмын дагуу шалгуулж шийдвэрлүүлэхээ албан ёсоор мэдэгдэж байна" гэсэн юм.