Хөгжлийн банкны асуудлаар нотлох баримт шинжлэн судлах сонсгол үргэлжилж байна.  “Бэрэн” групптэй холбоотой шинжээчдийн дүгнэлттэй танилцаж, гишүүд асуулт асууж, хариулт авч дууссан ба дараагийн зээл “Зэст өндөр ХХК-тай холбоотой танилцуулга эхэлж, гэрчүүдийг орууллаа. “Зэст өндөр” ХХК-тай холбоотойгоор зургаан субъектийг гэрчээр дуудсан байна. 

Шинжээчийн дүгнэлт: “Зэст өндөр” компанид олгосон Шивээ овоо, төмрийн хүдэр ашиглах төсөл хэрэгжүүлэх 9,7 тэрбумын зээлийг иенээр олгосон ба 2022 оны байдлаар 12 гаруй тэрбум төгрөгийн зээлийн үлдэгдэлтэй. Барьцаа хангалтгүй, хуулийн шаардлага хангаагүй төсөлд зээл олгосон байна. Зээлдэгч хамаарал бүхий Заг инжеренг компанид ажил гүйцэтгэх гэрээ байгуулан 3,4 тэрбумыг шилжүүлсэн ч ажил хийгдээгүй, зээлийг төлөөгүй байна. 

УИХ-ын гишүүн  Б.Энхбаяр: Гол захирал болох Эрдэмжаргал яагаад ирээгүй юм бэ?

Санхүүгийн газрын дарга Б.Батболд: Эрдэмжаргал захирал ажлаасаа гарсан. 

Б.Энхбаяр: Шинжээчийн дүгнэлтэд 3,9 тэрбумыг зориулалтын бусаар зарцуулсан гэж гарсан. Хамгийн том дүнтэй нь “Заг инжеренг” -ийн үйл ажиллагааны зардалд зарцуулчихсан байна. Заг инжеренг ХХК нь ... тоот данснаас 3,1 тэрбумыг шилжүүлж, хадгаламж барьцаалсан зээл хаасан гэсэн дүгнэлт гарсан. Та санал нийлэх үү?
Б.Батболд: Санал нийлэхгүй байна

Б.Энхбаяр: ТЭЗҮ-гүй иж бүрэн бус ус ашиглах гэрээ байгуулаагүй байхад зээл олгохыг яагаад дэмжсэн юм бэ?

Хөгжлийн банкны хуулийн хэлтсийн дарга асан Будхүү: Зээлийн хороо зарим шаардлага хангаагүй ч дэмжээд тодорхой нөхцөл заагаад дэмжсэн төсөл цөөнгүй бий. Түүний нэг гэж бодож байна. Цахилгаан хангамжийн асуудлыг одоог хүртэл шийдээгүй байгаа.