Хөгжлийн банкны хэргээр УИХ-ын гишүүн Ё.Баатарбилэгт анхан шатны шүүхээс зургаан жилийн хорих ял оноогоод буй. Харин үүнтэй холбогдуулж түүний УИХ-ын гишүүний бүрэн эрхийг түдгэлзүүлэх асуудал сөхөгдөнө. Наадмын өмнө шүүхийн шийдвэр гарсан ч өнөөг хэр Ё.Баатарбилэг давж заалдаагүй. Иймд намрын чуулганаар түүний бүрэн эрхийн асуудал хэрхэх нь анхаарал татаж буй.

УИХ дахь МАН-ын бүлэг хуралдаж дуусаад, мэдээлэл хийх үеэр дээрх асуудлыг сэтгүүлч тодрууллаа.

 МАН-ын бүлгийн дарга Д.Тогтохсүрэн "Эрүүгийн хэрэг хянан шийдвэрлэх тухай болон УИХ-ын тухай хуулиар зохицуулсан. Давж заалдах шатны шүүхийн шийдвэр гарсны дараа бүрэн эрхийг түдгэлзүүлдэг. Ё.Баатарбилэг гишүүнийг давж заалдаж байгаа болов уу. Өөрөө ёс зүйн хувьд хуралд оролцох нь тохиромжгүй тулд хуралдаандаа суухгүй байгаа юм байна гэж ойлгож байгаа" гэлээ.