Хөгжлийн банкнаас олгосон зээл, түүний эргэн төлөлтийг шалгах УИХ-ын Хянан шалгах түр хорооны нотлох баримтыг шинжлэн судлах сонсгол үргэлжилж байна. Сонсголоор яг одоо "Монгол мах экспо" ХХК-ийн Хөгжлийн банкнаас авсан зээлийн талаар хэлэлцэж байна. Энэ үеэр хууль бус зарцуулалттай холбоотой шинжээчийн дүгнэлтийг танилцууллаа. Тодруулбал, "Монгол мах экспо" ХХК 2017 онд нь Хөгжлийн банкаас монгол мах боловсруулах төв байгуулах төслийг  хэрэгжүүлэхээр 37 тэрбум төгрөгийн санхүүжилт бүхий зээлийг зургаан жилийн хугацаатайгаар авчээ. Гэвч шинжээчийн дүгнэлтээр зээлийг 100 хувь зориулалт бусаар зарцуулсан гэж мэдэгдсэн нь анхаарал татаж байна.
Зээлдэгч нь 29.05 тэрбум төгрөгийг Капитал банкны өөрийн хөрөнгөд 2018 онд оруулж, үлдэгдэл 2.7 тэрбум төгрөгийг "Монгол Анар Трейд" ХХК-ийн Капитал банкин дахь зээлийг хаажээ. Өөрөөр хэлбэл, "Монгол мах экспо" компанийн зүгээс Хөгжлийн банкинд гаргаж өгсөн тайланг хуурамчаар бүрдүүлсэн гэх шинжээчийн дүгнэлт гарчээ.