Сүүлийн үед Сири болон Ирак дахь АНУ-ын цэргийн баазууд руу дрон, пуужингаар халдах нь нэмэгдсэн билээ. Хамас, Израилын дайн эхэлснээс хойш АНУ болон холбоотны цэргийн баазууд руу 12 удаа халджээ.
АНУ эдгээр халдлагыг үйлдэж буй этгээдүүдийг Иран тэтгэж байгаа гэж үзэж буй. Тэгвэл АНУ-ын зэвсэгт хүчин Сирийн зүүн хэсэгт оршдог Иран болон тэдэнтэй холбоо бүхий зэвсэглэсэн этгээдүүд байрласан байгууламжид агаарын цохилт өгчээ.
Үүний талаар АНУ-ын Батлан хамгаалахын сайд Ллойд Остин “Ирак болон Сири дэх АНУ-ын цэргүүдийг хамгаалахын тулд нарийвчлалтай пуужингаар агаарын цохилт өгсөн. Энэ нь Ираны дэмжлэгтэй үйл ажиллагаа явуулдаг зэвсэглэсэн бүлгэмүүдийн халдлагын хариуг барьсан явдал” гэж мэдэгдэл хийжээ.
Мөн АНУ-ын Ерөнхийлөгч Жо Байден Ираны удирдагч Аятолла Али Хаменейд хандаж Ойрх Дорнод дахь АНУ-ын цэргүүд рүү халдахгүй байхыг анхааруулсан байна. АНУ Сирид 900, Иракт 2,500 гаруй цэрэгтэй. Үүн дээр нэмж 900 цэрэг Ойрх Дорнодод байршуулна гэж тус улс мэдэгдсэн байна.
Эх сурвалж: BBC