Өмнөх онуудад ЕБС-ийн үдийн цай хөтөлбөрийн хоолны материалын тендерийг бүтэн хичээлийн жилээр нь нэг компани худалдаж аваад хариуцдаг байсан бол энэ оноос БШУЯ сургуулийн захиргаанд тендер сонгон шалгаруулах ажлыг даалгажээ. Тиймээс энэ есдүгээр сараас эхлэн сургуулиуд үдийн цайны материалдаа тендер зарлаж байгаа ч төсвийн мөнгө нь багаас болж тендерт оролцох компани олдохгүй байгаа аж.

Тодруулбал, Хөвсгөл аймгийн Мөрөн сумын үндэсний лаборатори, улсын тэргүүний "Эрдмийн далай" цогцолбор сургуулийн бага ангид нийт 1193 хүүхэд сурдаг. Нэг хүүхдэд ногдох үдийн цайны төсөв 1500 төгрөг. Тус сургуулийн захиргаа 09-р сард 69.9 сая төгрөгийн төсөвтэй үдийн хоолны материал худалдан авах тендер зарласан ч одоог хүртэл нийлүүлэх компаниа олоогүй явсаар санхүүжилтийн мөнгө нь 30 сая хүрэхгүй болжээ. Үлдсэн энэ мөнгөөр тус сургуулийн 1200 орчим сурагч он дуустал буюу сурагчийн амралтыг хасаад ойролцоогоор 40 хоног хооллох ёстой болсон аж.

Улсын хэмжээнд 380 мянга гаруй сурагч үдийн цай хөтөлбөрт хамрагддаг бөгөөд жил бүрийн төсөвт зардлыг нь тусгаж, нэг сурагчид өдөрт 1500 төгрөгийн үдийн цай өгдөг. Тэгвэл БШУ-ы сайд Л.Энх-Амгалан "Сурагчдын хоолны мөнгийг төсвөөс бус сурагчдын эцэг эхийн зардлаар нэмэх нь зүйтэй" хэмээсэн билээ.