УИХ-ын 2024 оны сонгуулиар бүрдэх парламент тойргоос сонгогдсон 78, жагсаалтаар нэрлэгдэх 48 гишүүн, нийт 126 гишүүнтэй байхаар Үндсэн хуульд өөрчлөлт орсон. Энэ дагуу улс төрийн намууд 2024 оны сонгуульд өрсөлдөхөөр бэлтгэлээ базааж байна. Бүр зарим нь сонгууль угтаж цүнх баригч нараараа малчдад машин мотоцикл тараагаад эхэлсэн. Сонирхуулахад ерөнхийлөгч У.Хүрэлсүхийн зөвлөх 21 аймгийг гороолж, сугалаа тарааж, бэлэг цацлаа. Тэгвэл 126 гишүүнтэй болох ирэх жилийн улс төрийн марафоны урт жагсаалтыг хэн хэн тэргүүлэх бол гэсэн асуудал ихээхэн сонирхол татаж байгаа. Үүнийгээ дагаад намуудын стратеги яригдаж эхэллээ. Тиймээс Л.Оюун-Эрдэнэ, У.Хүрэлсүх нар хэдий хагаралдаантай байгаа ч удаа дараагийн томилолт хийж, ихээхэн идэвхи зүтгэлтэй байгаа зураглалыг олон нийт харж байна. 
Өнгөрөгч есөн сараас эхлээд намууд жагсаалтын дэсээ гаргаж, сонгогчдын уур амьсгалыг шиншилж эхэлсэн. Одоо жагсаалт, мандатын ерөнхий зураглал намын дарга нарын цээжинд байгаа. 
НЭГ. МОНГОЛ АРДЫН НАМ
Дотооддоо хагаралдаантай байгаа МАН. Ерөнхий сайд Л.Оюун-Эрдэнэ,хотын дарга асан Д.Сумъяабазар нарын зураглалаар бол эл намын жагсаалтыг Н.Учрал, Г.Тэмүүлэн нарын залуу гишүүд тэргүүлнэ. Харин У.Хүрэлсүх, Д.Амарбаясгалан нарын зураглалаар бол УИХ-ын дарга Г.Занданшатар тэргүүлэх нь ойлгомжтой. 

• МАН-ын дарга Л.Оюун-Эрдэнэ 2024 оны УИХ-ын сонгуулиар Хэнтий аймагт нэр дэвшинэ, хуучин мандатаа эзэмшинэ гэдгээ намынхандаа илэрхийлсэн. Тэрбээр Б.Дэлгэрсайхан, Б.Чойжилсүрэн, Ч.Хүрэлбаатар, Ж.Ганбаатар зэрэг тойрогтоо дараалан сонгогдсон гишүүдэд мандат олгоно. Харин Б.Бат-Эрдэнэ, Ц.Даваасүрэн, Д.Сарангэрэл, Г.Занданшатар нарын ахмад гишүүдээ тэтгэвэрт нь гаргах амбицтай байгаа. 
• Харин 11 дүгээр сард намаа эрхшээж чадвал Д.Амарбаясгалан Г.Занданшатарыг захлуулаад Д.Амарсайхан,С.Чинзориг, Д.Тогтохсүрэн нарын туршлагатай улс  төрчдийг индэрт гаргана.

ХОЁР. АРДЧИЛСАН НАМ
Х.Баттулга, Ц.Элбэгдорж гэж хоёр хуваагдчихаад байгаа Ардчилсан намын хувьд  ганц хүний гар харж суухаасаа нэгэнтээ өнгөрсөн. Тэгвэл ийм эгзэгтэй үед Ц.Элбэгдорж эл намын үндсэн зураглалыг өрж байгаа. Түүний зурснаар Лу.Гантөмөр намынхаа жагсаалтыг тэргүүлнэ. Харин Лу. Гантөмөрийн ард С.Баярцогт таахалзан зогсож байна. Өөрөөр хэлбэл Лу.Гантөмөр бол С.Баярцогтын ил дүр.  Рейтинг нь шалдаа буусан Ардчилсан намыг аврах сонгуулийн зургийг С.Баярцогт зурж, Ц.Элбэгдорж зөвлөнө. Лу.Гантөмөрийн араас Д.Ганбат, Н.Туваан нарын гишүүдийг дэсэлнэ. Уг намын нэг онцлог нь ирэх сонгуульд залуучуудаа түлхүү өрсөлдөөний талбарт гаргах төлөвтэй байгаа билээ.