Дийлэнх өрхийн мэдээлэл ийм гарч ирж байна. Айл өрх доод тал нь хоёр автомашин, хоёр байртай болоод сэрсэн байх жишээтэй. Хүүхдийн мөнгийг 91 хувьд нь хэвийн үргэлжлүүлж олгоно, харин баян, чинээлэгт тооцогдох есөн хувийг хасна хэмээж байсан бол өдгөө эсрэгээрээ есөн хувьд нь олгоод, 91 хувийг нь хасчихаж. Е Mongolia системд гарч ирж байгаа мэдээлэл тэр. Тиймээс иргэд ажил хийхээр их орлого оллоо тэтвэр нэмлээ гэнэ, аятайхан, боломжийн амьдарч байна гээд хүүхдийнх нь мөнгийг хасчихна. 

Хүү маань ганцаараа ажилладаг. Бэр маань сургуулийн хоёр, бага насны нэг хүүхдээ хараад гэртээ байдаг. Ганц аавынх нь цалингаар яаж амьдрах юм бэ. Эцэг, эх хоёр нь хүүхдэдээ ч зав гарах боломжгүйгээр өглөөнөөс үдшийн бүрий хүртэл ажиллаж байна. Амьдралаас илүүчлэн хэдэн төгрөг хурааж түүн дээрээ хүүхдийнхээ мөнгийг нэмээд сургалтын төлбөрийг нь төлчихдөг юмсан. Энэ төр, засаг уйддаг юм уу. Зүгээр олгож байсан хүүхдийн мөнгийг чинээлэг айлын хүүхдүүдэд хэрэггүй хасна гэчихээд өнөөдөр мөрөөрөө хөдөлмөрлөж, улсдаа татвар төлж яваа эцэг, эхчүүдийг нь шийтгэж, хүүхдүүдийнх нь мөнгийг хаслаа гэх гомдол, бухимдал сошиалаар нэг хөвөрч байна. 

Үнэхээр л өмнө зүгээр олгоод болоод байсан мөнгийг бөөн ажил удаж шинэчиллээ гэсэн бүр холион бантан болгоод хутгачихаж. Байсхийгээд энэ мэт шаль ялихгүй зүйлээр нийгмийг, ард иргэдийг бухимдуулж, стресстүүлж чадах юмаа, энэ төрийнхөн...