Үндэсний уран хатгамалчдын анхдугаар чуулганыг ирэх сарын 15-17ны өдөр зохион байгуулах ажээ. Уг чуулганы эхний хоёр өдөр буюу 15, 16-ны өдөр “Хатгамаллах урлагийн гайхамшиг-4” үзэсгэлэнг Монголын үндэсний музейд иргэдэд үнэ төлбөргүй үзүүлэх юм байна. Сүүлийн өдөр буюу 17-ны өдөр 1000 уран хатгамалч Төрийн ордонд цуглаж нэгэн зэрэг учиг шаглах ажээ. Өв соёлыг хадгалах зорилготой энэхүү чуулган 21 аймаг, есөн дүүргийн уран хатгамалч, зээгт наамалч, эсгий ширмэлч, зоос ширээний сүлжмэл болон уран сүлжээчдэд нээлттэй аж.
Тус үзэсгэлэнгээс нийт долоон төрөлд дөрвөн шагналт байр шалгаруулах бөгөөд оролцогчдын тоо хязгаартай юм байна.
Уралдаанд
Үндэсний уламжлалт, уран хатгамал /зүү ороох, загасан нуруу хатгах/
Бусад төрлийн хатгамал
Зээгт наамал
Эсгий ширмэл
Зоос ширээний сүлжмэл болон уламжлалт уран сүлжээ, зангилаа
Мартагдсан соёлын өвийг сэгрээж урласан бүтээл
Соёлын бүтээлч үйлдвэрлэлд зориулсан бүтээгдэхүүнээр оролцох аж.
Уралдааны шагналд,
I байр 7, “МУ-ын УРАН ХАТГАМАЛЧ” цол тэмдэг, өргөмжлөл,  1 000 000 төгрөг
II байр 7, өргөмжлөл  700 000 төгрөг
III байр 7, өргөмжлөл 500 000 төгрөг
Тусгай байр 7, өргөмжлөл 250,000 төгрөг
МҮУУХХолбооны тэргүүний нэрэмжит “Өвлөн уламжлагч хатгамалч" таван шагнал гардуулна. Бусад оролцогчдод Талархлын бичиг гардуулах ажээ.
Үндэсний уран хатгамалчдын уралдаанд байр эзлэсэн уран бүтээлчдийг цаашид дотоод, Олон улсын урлаг соёлын наадам, үзэсгэлэн уралдаануудад зуучлан оролцуулна хэмээн Монголын үндэсний уран хатгамалчдын холбооноос мэдэгджээ.