Нотлох баримтыг шинжлэн судлах сонсгол өнөөдөр хоёрдахь өдрөө үргэлжилж байна.  Энэ өдөр 15 компанийн зээлийн талаар сонсох бөгөөд яг одоо “Эрэл” ХХК-тай холбоотой зээлийн мэдээллийг судлан шинжилж байна. 
“Эрэл” компани нь 14 сая ам.доллар, 13,1 сая евро, есөн сая ам.долларын гурван удаагийн зээл авчээ. Харамсалтай нь, 14 сая ам.доллар, есөн сая ам.долларын зээлийг зориулалтын бусаар зарцуулсныг шинжээч тогтоосныг танилцууллаа. Мөн тус компани зээлийн чанарын муу зэрэглэлд оржээ. 

УИХ-ын гишүүн Б.Энхбаяр: Төрөөс зээл авна, тэгснээ төлөхгүй төр буруутай гэнэ.  Та зөв ярина шүү...Н.Батшугар гишүүн та яагаад ийм бяртай байгаа юм бэ гэж асуугаад байна л даа... Засгийн газар гуйгаад оруулаад ирсэн юм шиг ярьсан. Энэ төслийг ер нь та хөөцөлдөөд явсан юм уу, Засгийн газар таныг гуйсан юм уу?

“Эрэл” ХХК-ийн захирал Б.Эрдэнэбат: Тийм зүйл байхгүй. 

УИХ-ын гишүүн Т.Доржханд: манай бондын зөвлөл маш хурдан шуурхай шийддэг юм байна. Та танилцууллаа, барилга барьсан, Засгийн газар хэлсэндээ хүрсэнгүй. Таны зээлийг шийдээд өгье, барьсан байшинг чинь худалдан авъя гэснээ авсангүй гэж байна. Та санал нийлж байна уу? 

“Эрэл” ХХК-ийн захирал Б.Эрдэнэбат: Засгийн газрын 2016 оны 121 дүгээр тогтоол энэ байна хэмээн үзүүлснээ баахан тогтоол, шийдвэрүүдийг үзүүллээ. 

УИХ-ын гишүүн Т.Доржханд: таны өмнөөс хэлчихье. Засгийн газрын 2013 оны тавдугаар сарын 18-ны 180 дугаар тогтоол байна. 14 сая ам.доллар өг гэсэн. Засгийн газар энэ шийдвэрийг гаргахын тулд Монгол Улсын  хууль тогтоомжийг зөрчсөн байна. Нэг үгээр, хууль зөрчин танд энэ цаасыг өгчихсөн байна гэв.