БНСУ АНУ-тай холбоотон болсны 70 жилийн ойн баяраараа рэп дуу, хоёр улсын харилцааны талаар олон нийтэд мэдээлэл өгөх зорилготой видео гэх мэт зүйлс гаргажээ.
70 жилийн түүхтэй АНУ, БНСУ-ын харилцаа нь 1950-аас 1953 оны хооронд болсон Солонгосын дайны үед эхэлсэн. Одоо БНАСАУ-ын үзүүлж буй заналхийллийн эсрэг АНУ-ын 28 мянган цэрэг Өмнөд Солонгост байршдаг билээ. Өмнөд Солонгосын Ерөнхийлөгч Юн Сок Ёл энэ жил Вашингтонд айлчлахдаа хоёр улсын харилцаа маш чухал гэдгийг онцолсон юм.

Ойн баярын дуунд хоёр улсын харилцааг “Аж үйлдвэр, эдийн засагт харилцан ашигтай. Эрх чөлөө, эв нэгдлийг хамгаалсан төгс нэгдэл” гэж бичсэн байна. Мөн өнгөрсөн сард АНУ дахь БНСУ-ын Элчин сайдын яам ойн баярт зориулж Өмнөд Солонгос, АНУ-ын далбаатай үндэсний хувцас бүхий загварын шоу зохион байгуулжээ.

Харин Өмнөд Солонгос дахь АНУ-ын Элчин сайдын яам цайны газартаа булан байгуулж Америк, Солонгост үйлдвэрлэсэн шар айргануудад “Alliance Pale Ale” гэсэн шошго тавьж худалдаалж байгаа аж.
Эх сурвалж: Reuters