Үндэсний статистикийн хорооноос өнөөдөр МУ-ын нийгэм, эдийн засгийн байдлын 2022 оны урьдчилсан гүйцэтгэлийг танилцууллаа. Инфляцын түвшин буюу хэрэглээний бараа үйлчилгээний үнэ өмнөх оны арванхоёрдугаар сард улсын хэмжээнд 2021 оны мөн үеэс 13.2 хувь, харин өмнөх сараас нэг хувиар өссөн байна. Хүнсний бараа, ундаа, усны бүлгийн үнэ дүнгээрээ 15.4 хувь, хувцас, бүс бараа, гутал 18.5 хувь, орон сууц, ус цахилгаан, хийн болон бусад түлш 15.4 хувь өссөн байгаа бол эм тариа, эмнэлэгийн үйлчилгээ 17.4 хувь өссөн нь голлон нөлөөлсөн байна. Харин хэрэглээний бараа, үйлчилгээний үнэ өмнөх оны арваннэгдүгээр нэг хувиар өсөхөд хүнсний бараа, ундаа, ус 1.9 хувь, согтууруулах ундаа, тамхи 0.6 хувь, тээврийн бүлгийн үнэ дүнгээрээ 0.4 хувь өссөн нь голлон нөлөөлжээ. Мөн түүнчлэн инфляцид голлон нөлөөлсөн 10 бүтээгдэхүүний үнийн өсөлт нийт инфляцын 24.5 хувийг эзэлж байна гэсэн мэдээллийг өглөө.