УИХ-ын чуулганы өнөөдрийн хуралдаанаар 2024 оны төсвийн төслийг хэлэлцэж байна. Энэ үеэр УИХ-ын гишүүн М.Оюунчимэг, "Гадаадад эмчлүүлэх хүсэлт өгч буй иргэдийн тоо нэмэгдэж байгаа. Ялангуяа сүүлийн үед ховор төрлийн хавдраар өвчилж буй хүүхдүүдийн тоо эрс нэмэгдэж байна. ЭМД-ын сангаас гадаадад эмчлүүлж буй иргэдэд олгох мөнгөн дүнг нэмээд өгөөч гэсэн хүсэлт маш ирдэг боловч боломж байдаггүй. Гадаадад эмчлүүлж буй иргэдийн эмчлүүлсэн мөнгөн дүнгийн 5 хувийг нь л ЭМД-ын сангаас олгодог. Иймд тус сангийн хөрөнгийг нэмэгдүүлэх хэрэгтэй. Мөн зарим хүмүүст энэ мөнгөн дүн олгогддоггүй. Тиймээс ЭМД-ын сангаас мөнгө авахад ямар шалгуур тавигддаг вэ?

Эрүүл мэндийн сайд С.Чинзориг, " Тусгай сангийн хуулиар эрүүл мэндийг дэмжих сан ажиллаж байна. Дотооддоо эмчилж чадахгүй 26 төрлийн өвчин байна гэсэн судалгаа бий. Иймд эдгээр өвчнийг эмчилдэг техник технологийг оруулж ирэх шаардлага байна. Үүнийг энэ сангаар шийдэж өгөхийг зорьж байгаа. Мөн дотоодод эмчлэх боломжгүй өвчтөнүүдэд олгох таван хувийг нэмэгдүүлэх зайлшгүй шаардлагтай. Гэхдээ зөвхөн албан тушаалтнгуудад эмчилгээний төлбөр өгдөг гэсэн асуудал байхгүй. Энэ хууль батлагдвал дотооддоо эмчлэгдэж чадахгүй байгаа өвчтөнүүдэд олгох мөнгөн тэтгэмжийг нэмэгдүүлэх талаар нарийн журам оруулж ирнэ" гэв.