Бразил улсын ихэнх нутгаар урьд өмнө байгаагүй хэт халсны улмаас аюулын улаан түвшинг зарлаад байна. Тодруулбал өнгөрсөн ням гарагт Рио-де-Жанейро хотод 42.5 хэм хүртэл халсан нь 11 дүгээр сард агаарын температур дээд цэгтээ хүрч халсан үзүүлэлт болжээ.

Мөн Сан Паулу хотод мягмар гарагийн үдээс хойш агаарын дундаж температур 37.3 хэм байсан гэж Бразилын Үндэсний цаг уурын хүрээлэнгээс мэдээллээ. Одоогийн байдлаар Бразил улс даяар 100 сая гаруй хүн хэт халалтад ямар нэгэн байдлаар нэрвэгдээд байгаа аж. 

Тус улсын Үндэсний цаг уурын хүрээлэнгээс хэт халалтыг дэлхийн дундаж температурын өсөлт, түүнчлэн цаг уурын өөрчлөлтөд хүргэдэг "Эль Нино" үзэгдэлтэй холбон тайлбарлаж буй юм. Дэлхийн зарим хэсэгт "Эль-Нино" үзэгдлээс үүдэлтэй ган гачиг болдог бол зарим хэсэгт нь хүчтэй аадар бороо ордог. Хэдэн жилд нэг удаа ажиглагддаг энэ үзэгдэл нь Номхон далайн халуун бүсийн гадаргын усны хэмийг эрс дээшлүүлдэг бөгөөд хамгийн сүүлд 2018-2019 онд ажиглагджээ.