ЗТХ-ийн сайд С.Бямбацогт Азийн хөгжлийн банкны Монгол Улс дахь суурин төлөөлөгч Шэннон Коулинтэй уулзаж, Улаангом-Ховд, Улиастай-Алтай чиглэлийн авто зам төслийг ирэх онд хэрэгжүүлэхээр тохиролцлоо.

Талууд өнгөрсөн 10 дугаар сард уулзахдаа харилцан тохиролцсон авто замын төсөл, хөтөлбөрийн явцыг эрчимжүүлэх, авто замын коридоруудаа өргөжүүлэх талаар нэгдсэн ойлголтод хүрсэн юм.

Сайд С.Бямбацогт, Азийн хөгжлийн банкнаас манай улсад хэрэгжүүлж буй төсөл хөтөлбөрүүдийн үр өгөөжийг онцлоод, төслийн хүрээнд баруун бүсэд барьсан авто замууд нь ард иргэдийн талархлыг хүлээсэн, чанартай зам болсныг тэмдэглэв. 

Уулзалтын үр дүнд Ховд-Улаангом чиглэлийн 163.3 км, Улиастай – Алтай чиглэлийн 198 км авто замын эхлэл 100 км замын ажлыг шуурхайлж, 2024 оны хавар барилгын ажлыг эхлүүлнэ. Авто зам барихдаа Дархан-Улаанбаатар чиглэлийн авто замд гарсан алдаа дутагдлыг давтахгүй байх, зөвлөх үйлчилгээ үзүүлэх компанийг сонгоход анхаарах, замын засвар, арчлалтыг орхихгүй, тогтмол хугацаанд хийх, засвар арчлалт хариуцдаг компани нь асфальт бетон үйлдвэртэй байх шаардлага тавьж байгаа аж. Барьсан замаа чанартай, урт настай байлгахын тулд шаардлагатай тоног төхөөрөмжүүдийг ойрын хугацаанд худалдан авахаар болжээ. Түүнчлэн, талууд хамтын ажиллагаагаа бэхжүүлж, цаашид Монгол Улсын авто замын сүлжээг өргөжүүлэхэд хүчин чармайлт гаргаж, бодит үр дүнд хүрэхээ илэрхийлснийг ЗТХЯ мэдээлэв.