Хөгжлийн банкийг шалгах УИХ-ын түр хорооноос зохион байгуулж буй нотлох баримтыг шинжлэн судлах сонсголыг өнөөдөр гуравдахь өдрөө зохион байгуулна. 
Өнгөрсөн хоёр өдрийн сонсголоос дүгнэхэд, бизнес эрхлэгчид, Хөгжлийн банкнаас зээлсэн мөнгөөрөө мөрийтэй тоглодог, Макао, Сингапурын казинод тухалдаг, өмнөх өрүүдээ дараад үлдсэнээр нь тансагладаг, авсан зээлээрээ ББСБ байгуулж, түүгээрээ мөнгө угааж, үнэтэй автомашин, орон сууц худалдан авч, ер нь л эргүүлэн төлъе гэсэн бодолтой нь цөөн харагдана. 

“Бэрэн” группийн захирал Б.Мөнхтөр үнэнд гүйцэгдэж, казиногийн АТМ-ээс их хэмжээний бэлэн мөнгө авсан нь ил болж, “Эрэл”-ийн Б.Эрдэнэбатаас Хянан шалгах түр хорооны дарга, УИХ-ын гишүүн Б.Энхбаяр: Та Хөгжлийн банкнаас зээлсэн есөн сая ам долларын зургаан саяыг нь касснаас бэлнээр авчээ. Үнэн үү...

Б.Эрдэнэбат: Үнэн

Б.Энхбаяр: Та казино тоглодог уу гэхэд тэрбээр дуугарч төвдсөнгүй.

Энэ мэтчилэн эхнээс нь улайлгаж, эцсийн дүндээ Хөгжлийн банкнаас авсан зээлээр барьсан нүдэнд харагдаж, гарт баригдах бүтээн байгуулалт ховор байна.  (М.Билэгт гишүүний дөрөвдүгээр эмнэлгийг эс тооцвол) Харин гарч ирж буй баримт нотолгоогоор, бүгд л авсан зээлээ гарын салаагаар урсч, шинжээч зээлийг үр ашиггүйгээр зориулалтын бус зүйлд зарцуулсан тухай мэдээлж байх юм. Ганцхан жишээ дурдахад л, “Эгийн голын усан цахилгаан станц” төсөлд 2018 онд 10,6 сая ам.доллар буюу 21,4 тэрбумыг зарцуулж, үлдсэн 24 хувь болох 5,1 тэрбумыг тээврийн хэрэгсэл, тавилга, эд хогшил, бэлэг дурсгал болон бусад зүйлд зарцуулжээ.