Байнгын хэрүүл тэмцэл, талцал, хуваагдал, албан тушаалын төлөө өш зангидаж ирсэн АН-ынхан одоо л нэг цэгцэндээ орох нь уу гэсэн найдвар төрүүлж байна. АН энэ сарын 19-нд даргаа зарлана хэмээн эртнээс зарлаж, Их хурлаараа батламжлахаар болсон. Одоогийн байдлаар АН-ын даргад Сангийн сайд асан С.Баярцогт, БСШУ-ны сайд асан Лу.Гантөмөр,  гишүүн асан З.Нарантуяа, Л.Гүндалай нар өрсөлдөхөө ил тодоор зарласан. 
Мөн Увсын фракц болох ЗГХЭГ-ын дарга асан Ц.Нямдорж, Улсын Ерөнхий прокурор асан Д.Дорлигжав нар Лу. Гантөмөрийг дэмжиж, ард нь асаалттай танк байхаа илэрхийлсэн гэнэ. С.Эрдэнэ ч мөчөөгөө өгөхгүй би дарга нь хэвээр хэмээн цамнасаар байгаа бол эмчлүүлэх гэж яваад хор найруулаад ирсэн гэх Х.Баттулга ч улс төрд идэвхийлэн орсон. 
Харин Монгол Улсын Ерөнхийлөгч асан Ц.Элбэгдорж сошиал хаягаараа "Хөөе, Эрдэнээ, Баттулга аа. Би ч орно. Гурвуулаа хол байя. Жолоогоо татъя. ҮБХ-ны гишүүд өөрсдөө намын даргаа сонгог. Элдэв тайлбар, шалтгаан, оролцоо энд илүүц. Гишүүддээ итгэе. Боломж олгоё. Тэд чадна. Ардчилалтай, хүчирхэг Ардчилсан нам Монголд хэрэгтэй" хэмээх байр суурийг илэрхийллээ. Түүний хувьд ажиглагчийн, эв нэгдлийг эрхэмлэгч байр сууринаас оролцох нь тодорхой болж, нөгөө хоёртоо ч уриалаад амжлаа. Харин дагах эсэх нь даанч эргэлзээтэй юм.