УИХ-ын гишүүн Х.Болорчулуун УИХ-ын чуулганы үеэр үг хэллээ. Тэрбээр "Хүнсний салбарт төрийн хамгаалалт хэрэгтэй байна. Үүнд тавхан хувийн татвар үнэхээр хамгаалалт болж чадахгүй. Хөдөө аж ахуй болон хүнсний үйлдвэрлэл эрхэлдэг компаниудад 700 тэрбум төгрөгийн 5-6 хувийн хүүтэй зээл олгогдоод байна. Зөвхөн зээл олгоод ч асуудал шийдэгдэхгүй. Борлуулахад төрийн хамгаалалт хэрэгтэй байна. Импортын бүтээгдэхүүнд бут цохиулна. Импортын татварын барааг жилд таван хувиар нэмж 2026 онд 20 хувь хүргэх хэрэгтэй. Дэлхийн худалдааны байгууллагын өмнө авсан үүрэг амлалтынхаа хүрээнд нэмэгдүүлнэ. Тэгэхгүй бол хоёр том улсын үйлдвэрлэгчдийн дэргэд манай үйлдвэрлэгчид “цохиулаад” байна.

Бидний хийж үйлдвэрлэж чадахгүй элсэн чихэр, ургамлын тос, будаа зэрэгт бол татвар тавиад яах вэ. Монгол Улс анх удаа дотоодоо 85 хувь хүнсний ногоогоор хангаж үзэж байна. ирэх жил 90 хувьд хүргэнэ. Ингэхэд бодлого хэрэгтэй. Зарим хүмүүс улс төржүүлж юмны үнийг өсгөх гэлээ гээд байдаг. Энэ бол дотоодоо дэмжих бодлого юм шүү. Ард иргэдэд лангуу биш ажлын байр үйлдвэрлэл хэрэгтэй" гэлээ.