Хөгжлийн банкны зээлдэгчдийн нотлох баримтын сонсгол гурав дахь өдрөө үргэлжилж байна. Тус банкийг хянах шалгах УИХ-ын түр хорооны гишүүд зээлийн мэдээлэл, эргэн төлөлт, зарцуулалтад хийсэн шинжээчийн дүгнэлтэд үндэслэн асуулт асууж, гэрчүүдээс хариулт авч байна.
Уг сонсголыг Хянан шалгах хорооны дарга Б.Энхбаяр удирдаж, бүрэлдэхүүнд Ц.Мөнхцэцэг, Д.Ганбат, Ж.Бат-Эрдэнэ, Ж.Сүхбаатар нарын гишүүд багтсан бөгөөд тэд голлох асуултыг тавьж буй юм.

Харин дундуур нь үймүүлэгч гишүүнээр Д.Ганбат тодроод байна. Тэрбээр сонсголын эхний өдөр асуулт асуух гэж далийн, асуудлаасаа халиад байсанд Б.Энхбаяр даргалагчийн хувьд сануулж, анхааруулж байсан. Гэвч тэрбээр үг хэлүүлсэнгүй. Даргалж байгаа гээд ингэж болдог юм уу хэмээн хэгжүүрхэж байсан билээ. Сонсголын хоёрдахь өдөр Д.Ганбат  гишүүн сонсголын  дундуур орж ирэн, улстөржсөн асуулт асууж, хурал даргалагчаас сануулга аваад амжсан. 

Тэгвэл гуравдахь өдрийн буюу өнөөдрийн сонсголд орж ирснээ гэнэт хурлыг хаяж байгаагаа мэдэгдэв. Д.Ганбат гишүүн “Намайг орж ирэхгүй, суухгүй байна гэх юм. Боломж өгөхгүй болохоор би гараад явчихаад байгаа. Нэг намаас олонх байгаа үед ийм байдгийг мэдэрлээ. Та нар маань л ажлаа сайн хий, энэ сонсгол хэрэгтэй. Анхных гэдэг утгаараа алдаатай, оноотой байгаа байх. Цөөнхийн бүлэг, сөрөг хүчний гишүүд асуух гэхээр амыг нь таглаад байна. Тавилттай болох гээд байна шүү, үүнийгээ анхаараарай. Цаашид хуралд сууж чадахгүй” хэмээн сүржин мэдэгдэл хийв. 
Түүнийг тэр даруйдаа гараад явчихна хэмээн бусад нь харж байсан  ч тэрбээр сонсголд үргэлжлүүлэн суусаар байгаа юм. Үгийг нь сонсохгүй байгаад бухимдсан эрхэм гишүүн аргадуулах санаатай мэдэгдэл хийсэн ч бусад ийнхүү үл тоов.