"Нүүрсний” сонсголын хоёрдахь шат үргэлжилж байна. Энэ үеэр нүүрсний компаниудын улс төрийн хамаарал бүхий албан тушаалтнуудыг танилцуулж буй бөгөөд УИХ-ын гишүүн Ш.Адьшаагийн хамаарал бүхий болон зөвлөхөөр нь ажиллаж байсан Мөнхцэцэгийн талаарх мэдээллийг шинжээч танилцуулсан юм.  УИХ-ын гишүүн Ш.Адьшаа энэ талаар тайлбар хийлээ. Тэрбээр “Өнөөдөр би сонсголд ард түмнээ, төрөө хүндлээд ирсэн юм. Ийм гүжир гүтгэлэг Монголын түүхэнд дахин байх юм уу мэдэхгүй байна. 2012 оноос хойш миний бие, миний ах дүү хамаарал бүхий хүмүүс нүүрс худалдан авах болон хөрс хуулалтын бизнес хийсэн бол би хуулийн хариуцлага хүлээхэд бэлэн байна. Би хариуцлагатайгаар хэлж байна. Энэ нүүрсний сонсгол зорилгоосоо хазайлаа. Жинхэнэ гөлөг төөрүүлэх ажиллагаа явж байгаа юм биш үү дээ. Миний хувьд олон хулгай нүүрсний асуудлыг шалгуулж, Хянан шалгалтын сонсгол хийхээр төлөвлөж товыг зарласан байсан.  Улс төрийн зорилгоор хэн нэгнийг харлуулах, гол гэрчийг оролцуулахгүй, том хулгайг нуух зорилго агуулах магадлалтай байна. Ганхуягийг яагаад оролцуулахгүй байна вэ. Заавал оролцуулахыг хууль тогтоогчийн хувьд албан ёсоор мэдэгдье. Үнэхээр шинжээч нар хариуцлагагүй байна уу, улс төрийн даалгавар биелүүлээд байна уу гэдэг асуудал үүслээ. Эхний сонсголд нас барсан хоёр иргэнийг дуудсан. Энэ сонсголд дахин нэг нас барсан иргэнийг дуудлаа. Дээрх гурван талийгаачийн гэр бүл төрөл төрөгсдөөс уучлал хүсье” гэв.