Гадаадын тусламж гацсан тул зарим бүс нутагт цэргийн ажиллагаагаа цомхотгохоос өөр аргагүйд хүрснийг Украин анхаарууллаа.

"Арми бүх фронтын шугам дагуу сумны хомсдолд орсон нь том асуудал үүсгээд байна. Энэ нь АНУ болон Европын холбооны олон тэрбум ам.долларын тусламж улс төрийн хэрүүл маргаанаас болж зогссонтой холбоотой. Украины армид их бууны сум хомс байна. Бидэнд байгаа нь хэрэглээ хангаж хүрэхээргүй байна. Тиймээс бид сумны хуваарилалтаа дахин хийж, зарим цэргийн ажиллагааг цомхотгож байна. Гадаадын тусламж багасч байгаа нь байлдааны талбарт нөлөө үзүүлж, тактикаа өөрчлөхөд хүргэж байна" гэж генерал Олександр Тарнавский хэлэв. 

Өөрөөр хэлбэл, зарим хэсэгт довтолгоогоо үргэлжлүүлж байгаа бол зарим хэсэгт хамгаалалтын горимд шилжихэд хүрчээ.

АНУ-ын Конгресс дахь бүгд найрамдах намынхан энэ сарын эхээр Украинд зориулах 60 тэрбум ам.долларын багцад хориг тавьсан. Үүний дараа Унгар улс Европын холбооны 55 тэрбум ам.долларын тусламжийн хэлэлцээрт мөн хориг тавьжээ. Гэхдээ Европын холбооны бусад удирдагч Украиныг дэмжлэггүй үлдээхгүй гэдгээ мэдэгдсэн. 

Европын холбоо ирэх оны гуравдугаар сар гэхэд нэг сая их бууны сум илгээнэ гэж амласан ч одоогийн байдлаар ердөө 480 мянгыг нийлүүлжээ. 

Эх сурвалж: BBC