Zarig.mn сайтын эрхлэгч, сэтгүүлч Н.Өнөрцэцэгийг цагдан хориод хэдийн 16 хоног өнгөрч байна. Энэ хугацаанд өмгөөлөгч нарын зүгээс сэтгүүлч Н.Өнөрцэцэгт авсан цагдан хорионы арга хэмжээг цуцлуулж, батлан даалтад гаргах хүсэлтийг нийт дөрвөн удаа гаргажээ.

Гэвч шүүхийн байгууллагаас сэтгүүлч Н.Өнөрцэцэгийн өмгөөлөгч нарын хүсэлтийг ханган шийдвэрлэхээс татгалзсан хэвээр байгаа нь олны анхаарлыг татаж байгаа юм.

Хамгийн сүүлд өчигдөр |2023.12.29| өмгөөлөгчдийнх нь зүгээс "Бага насны хүүхдүүдийг нь асран хамгаалах хүнгүй" гэх шалтгаанаар шүүхэд хүсэлт гаргасан ч  уг хүсэлтийг өмнө нь хэлэлцсэн тул хэлэлцэхээс татгалзсан шийдвэр гаргав.

Сэтгүүлч Н.Өнөрцэцэгийн асуудлаар Зариг.мн редакциас төрийн гурван өндөрлөгт хандсан. Мөн Олон улсын сэтгүүлчдийн холбооноос түүнийг суллахыг уриалж байна.

Түүнд Эрүүгийн хуулийн 13.14 буюу илтэд худал мэдээлэл тараах зүйл ангиар нийт зургаан хэрэг үүсгэж, мөрдөн шалгах үйл ажиллагааг түүнийг саатуулахаас өмнө эхлүүлээд байв.