Ромын пап лам Францис Католик шашны номлогч нар сүмийн энгийн зан үйл, мөргөлийн нэг хэсэг биш тохиолдолд ижил хүйстэй хосуудыг ивээж болно гэж шийдсэнийг Ватикан даваа гарагт /2023.12.18/ мэдэгджээ.

2021 онд Ватиканаас гаргасан тогтоолыг энэхүү шийдвэр нь хүчингүй болгож буй. Мөн Гэгээн ширээт улс ижил хүйстэй хосуудыг ивээх нь хэвийн бус нөхцөл байдлыг хуульчлах биш Ертөнцийн эзэн бүгдийг хүлээн авдаг гэдгийг харуулж буй бэлэг тэмдэг гэсэн байна.

Тус шийдвэрийн талаарх баримт бичиг дээр номлогчид тохиолдол бүрийг тус тусад нь авч үзэж, өөр шийдвэр гарган энгийн ивээлээр дамжуулан Ертөнцийн эзний тусламжийг эрэлхийлж байх магадлалтай хүмүүсийг сүмд ойртохоос хориглох ёсгүй гэж бичжээ.

Баримт бичигт ивээлийг хуримын ёслолтой ямар нэгэн байдлаар холбож болохгүй, гэрлэх ёслолын хувцас, заншил, үг хэллэг оролцуулалгүй хийх ёстой гэж нэмж бичсэн байна.

Ватикан ижил хүйстэндээ татагдах нь гэм биш харин ижил хүйсийн үйлдэл хийх нь гэм гэж заадаг. Францис 2013 онд Пап ламаар сонгогдсоны дараа дэлхий даяар 1.35 гаруй гишүүнтэй Католик сүмийг ЛГБТ хүмүүст илүү нээлттэй болгох тал дээр ажилласаар ирсэн юм.

ЛГБТ хүмүүст сүмийн үйлчилгээ үзүүлдэг Иезуит урсгалын Америк номлогч Жеймс Мартин энэхүү шийдвэрийг сайшааж, томоохон дэвшил гэсэн байна. Харин АНУ-ын Нотре Дам их сургуулийн теологийн профессор Улрих Л.Леннер шинэ удирдамж нь үл ойлголцолд хүргэж, төөрөгдөл үүсгэх болно гэж хэлжээ.

Эх сурвалж: Reuters