Украины армид 500 мянган цэрэг татах шаардлагатай байгааг Зеленский хэлэв. Киев хотноо болсон хэвлэлийн бага хурлын үеэр тэр "Армид 450-500 мянган цэрэг татах шаардлагатай байгаа. Энэ бол эмзэг бөгөөд зардал ихтэй ажил. Одоогоор бид 500 мянган цэргээ хэдийнэ фронтод илгээчихээд буй. Одоо байгаа цэргүүдээ ээлжлүүлэх, амраах гээд цогц төлөвлөгөө байх ёстой" гэжээ.

Гэхдээ эмэгтэйчүүдийг дайчлах саналыг Зеленский үгүйсгэсэн байна.

Харин ОХУ-ын цэргийн тусгай ажиллагаанд одоогоор 617 мянган цэрэг дайчлагдаад буйг Путин мэдэгджээ. Үүний зэрэгцээ агаарын довтолгооноос хамгаалах систем, харилцаа холбооны асуудал тулгарсан тул нисгэгчгүй онгоцны үйлдвэрлэлийг нэмэгдүүлэх шаардлагатай байгаа гэв.

АНУ болон Европын холбооны зүгээс Украинд үзүүлэх тусламж саатаад буй үед цэрэг татлагатай холбоотой энэхүү мэдэгдлийг Зеленский хийлээ.

АНУ-ын Конгресс дахь Бүгд найрамдах намынхан Украинд үзүүлэх 60 сая ам.долларын тусламжийг энэ сарын эхээр хориглоод буй. Цагаан ордон болон Төрийн департментын төлөөлөгчид АНУ энэ долоо хоногт Украинд дахин цэргийн тусламж үзүүлэхээр төлөвлөж буйг мэдэгдсэн. Түүнчлэн Европын холбооны 55 тэрбум ам.долларын тусламжийг Унгар хориглосон билээ. Гэхдээ Украин тусламжгүй үлдэнэ гэж байхгүйг Европын холбооны удирдагчид мэдэгдсэн.
Эх сурвалж: BBC