Шатахуун энэ сарын 18-нд хэвийн болно гэж салбарын сайд нь ам гарсан ч Монголчууд хот хөдөөгүй шатахуунд дугаарлаж хонох тоо олширсоор. АИ-92 байхгүй ч АИ-95 байгаа нь иргэдийг төөрөгдөлд оруулж байгаа нь нууц биш. Түүнчлэн нүүрсчдийг сонсгол дуустал “шатахуунаар” шоглож байна гэх яриа үүссэн. Үнэний ортой. Гэвч албаны эх сурвалжийн мэдээлж буйгаар Монгол улсын шатахууны нөөц дуусч байна. Үндсэндээ Оросууд Монголд сунгасан гараа татаж, буруу хараад суучихсан. Сонирхуулахад Ашигт малтмал газрын тосны газрын дарга Л.Баярмандал ОХУ-аар зочлоод асуудлаа тайлбарлаад ам руугаа нэг сайн алгадуулчихаад шийдсэн шийдэлгүй уржигдар буюу 12 дугаар сарын 20-ны өдөр ирсэн. Үүнээс даруй ганцхан хоногийн дараа “нүүрсний сонсгол”-д оролцох өдрөө Эрчим хүчний сайд Б.Чойжилсүрэн ОХУ-ыг зорилоо. Өөрөөр хэлбэл ардчилсан Монгол улсын дарга сайд нар гуйлга гуйхаар ээлж ээлжээр нисцгээж байна гэсэн үг. 

Шатахуунд дугаарлах иргэдийн тоо олшрох тусам чухам үнэний эрэлд гарагсад Ж.Ганбаатар сайдын үмхүүлсэн молигын учрыг тайлах гэж аргаа барж байна. Эрчим хүч болоод шатахууны гүн хомсдолд орсныг салбарын сайд нь тайлбарлахгүйгээр тайвшруулах гэж оролдсоны учир хэзээ тайлагдах вэ?