ОХУ-ын баруун хойд нутаг өчигдөр үдээс хойш олон арван автомашин ар араасаа мөргөлдсөн томоохон осол гарсны улмаас дөрвөн хүн амиа алдаж, зургаан хүн бэртжээ.

Новгород хотоос баруун хойд зүгт 30 км зайд хурдны зам дээр уг осол гарсан байна.

Ослын улмаас Санкт-Петербург хотыг нийслэл Москватай холбодог М11 хурдны замын хөдөлгөөнийг зогсоожээ.

Нийтдээ 50 автомашин мөргөлдсөн тухай Новогород мужийн захирагч Андрей Никитин сошиал хуудсандаа бичсэн байна.

Ослын улмаас зам дээр саатсан жолооч нарыг дулаацуулах, хоол хүнсээр хангах арга хэмжээ авч буйг захирагч бас мэдээлжээ.

Томоохон гэмт хэргүүдийг шалгах үүрэгтэй ОХУ-ын мөрдөн байцаах хороо ослын шалтгааныг тогтоох ажлыг эхлүүлсэн байна.

Эх сурвалж: The Moscow Times