Улаанбаатар хотод хог хаягдал хүлээн авах гурван цэг байна.
Тодруулбал, Сонгинохайрхан дүүргийн Нарангийн энгэрийн хогийн цэгт хог хаягдлын 50, Баянзүрх дүүргийн Цагаан давааны хогийн цэгт нийт хог хаягдлын 35, Хан-Уул дүүргийн Морингийн давааны хогийн цэгт нийт хог хаягдлын 15 хувь тээвэрлэгдэн ирдэг. Мөн тухайн байршилд хатуу хог хаягдал хүлээн авч, боловсруулах үйлдвэрийг байгуулж байгаа юм.

Тухайн цэгүүдэд аж ахуйн нэгж, байгууллага, иргэдийн болон нийтийн эзэмшлийн зам, талбайн цэвэрлэгээнээс гарсан хог хаягдлыг хүлээн авдаг бөгөөд өдөрт дунджаар 3000-4000 тн хог хаягдал төвлөрдөг. Төвлөрсөн хог хаягдлыг 2020 оноос ландфил технологи буюу хөрсөөр хучиж даран, талбайг нь нөхөн сэргээж эхэлсэн. Одоогоор 36 га талбайг нөхөн сэргээгээд байна.

Нийслэлийн Засаг даргын орлогч О.Номинчимэг “Хог хаягдлыг дарж булах, ландфил технологийг халж, Улаанбаатар хотын хог хаягдлын менежментийг шинэчлэх шаардлагатай байна. Ингэхдээ хог хаягдлыг ангилж хүлээн аван, шатааж, эрчим хүч гарган авах үйлдвэрийг Нарангийн энгэр, Цагаан давааны хогийн цэгт байгуулахаар судалж байгаа. Морингийн даваанд зөвхөн барилгаас гарсан хатуу хог хаягдлыг хүлээн авна. Хог хаягдал шатаах үйлдвэр байгуулах санал өмнө нь хувийн хэвшлийн байгууллагуудаас гарч байсан. Гэвч тарифын хөнгөлөлт үзүүлэхгүй бол ашиггүй байдаг учир уг ажил гацдаг байсан тул эдийн засгийн судалгааг хийж байгаа” гэлээ.

Түүнчлэн хогийн цэгүүдийн автопүү буюу хог хаягдлын жинг хэмжих, тооцох, тээврийн хэрэгслийн дугаарыг таних системийг шинэчилж, боловсронгуй болгох шаардлага тулгараад байгаа. Системд нэмэлт хөгжүүлэлт хийхэд тулгамдаж буй асуудлыг шийдэх ажлыг яаралтай зохион байгуулахыг холбогдох албаныханд даалгажээ.