ОХУ-ын бүртгэлтэй, зургаан зорчигчтой онгоц Ням гаригт Афганистаны дээгүүр нисч байгаад радарын дэлгэцнээс алга болсон гэж Кремлийн эрх баригчид мэдэгджээ. Харин Афганистаны цагдаагийнхан нийслэл Файзабадаас 200 орчим км зайд онгоц осолдсон тухай мэдээлсэн байна. Ослын бүс нь Афганистаны алс хойд хэсэгт орших Бадахшан хэмээх алслагдсан уулархаг бүс тул аврах баг явж очиход 12 цаг зарцуулагдах аж.

Энэ нь 1978 онд Францад үйлдвэрлэсэн "Dassault Aviation Falcon 10" тийрэлтэт онгоц байжээ.

Уг онгоц нь Тайландын Паттаяа хотын Утапао нисэх онгоцны буудлаас Энэтхэг, Узбекистанаар дамжин Москваг зорьсон түргэн тусламжийн онгоц байжээ. Онгоцонд Паттаяа дахь эмнэлгээс Москва руу шилжүүлж явсан орос иргэн байсан бөгөөд биеийн байдал хүнд, хэвтрийн өвчтөн байсан гэв. Өвчтөн эмэгтэй нөхрийн хамтаар явж байсан. Тэд Оросын өмнөд хэсгийн Волгодонск хотын оршин суугч байсныг хэвлэлд мэдээлж байна.

Онгоц радарын дэлгэцнээс алга болохоос 25 минутын өмнө шатахуун багассан тул Тажикистаны нисэх буудалд газардана гэж нисгэгч нь анхааруулжээ. Дараа нь нисгэгч нэг хөдөлгүүр зогслоо, хоёр дахь хөдөлгүүр зогслоо гэж ар араас нь мэдээлсэн байна.

Афганистаны Нисэхийн яамнаас мэдэгдсэнээр онгоцны явах маршрутад Афганистаны агаарын орон зайг дайран өнгөрөх төлөвлөгөө байгаагүй аж. Тиймээс онгоц техникийн асуудлаас болоод зам хазайсан байж магадгүй гэжээ.