Хятадын Цинхуа их сургуулийн инженерүүд дэлхийд анхных хэмээн тооцогдох шингэн санах ойг бүтээснээ танилцууллаа. Сунжирсан өтгөн металлаас бүрдэх шинэ бүтээгдэхүүнийг FlexRAM гэж нэрлэжээ.

FlexRAM-ыг галлиум гэдэг шингэн металлаар хийсэн бөгөөд уламжлалт транзисторыг орлох боломжтой ажээ. Шуурхай санах ойн төхөөрөмжийн ганцхан “дусал” нь 8 байтын мэдээллийг хадгалах хүчин чадалтай. Гэхдээ энэ нь DRAM санах ойтой  харьцуулахад маш бага юм. Найман FlexRAM санах ойн сүлжээг эрдэмтэд Ecoflex гэж нэрлэдэг материалд хуваан тараажээ. Энэ нь хэлбэр гажилтын үед түүний бүтцийг хадгалдаг тусгай төрлийн полимер (хуванцар) юм.

Шингэн RAM-ийн хоёр дахь сул тал нь гэвэл, ердөө 3500 удаа дахин бичих мөчлөгтэй. Гэсэн хэдий ч давуу талууд бас бий. Тухайлбал, FlexRAM нь унтарсан үедээ мэдээллийг 12 цагийн турш хадгалж чадна. 

Хэдийгээр шингэн санах ойн хүчин чадал одоогоор хязгаарлагдмал байгаа боловч эрдэмтэд уг технологийг ирээдүйтэй гэж дүгнэж байна. Жишээлбэл, уян RAM-ыг бичил төхөөрөмж, робот, тархины ухаалаг суулгац болон ирээдүйд зохион бүтээх бусад төхөөрөмжүүдэд ашиглах боломжтой.