Баянзүрх дүүрэгт ноцтой осол гаргасан Ч.Маралмаагийн хэргийг энэ сарын 24-ний өдөр дахин хэлэлцэнэ. Баянзүрх дүүргийн Эрүүгийн хэргийн анхан шатны хуралдаанаар Ч. Маралмаагийн өмгөөлөгч шүүх шинжилгээний дүгнэлтийг дахин гаргуулах хүсэлт гаргасан тул ийнхүү хойшлуулсан билээ. 
Хамгийн гол нь  Ч.Маралмаа 12-хон настай охинтой барьцан, гэмтэл хүнд биш хөнгөн хэмээн маргаж буйд л учир бий юм. Ослын бичлэгт  жаахан охиныг автомашинаар замын хавтан дагуулан чирч байгаа нь тодоос тод үлдсэн байхад хөнгөн л гэмтсэн биз дээ. Би хүлээн зөвшөөрөхгүй. Шүүхийн дүгнэлтийг дахин гаргуулна хэмээн маргаж суугаа нь ичгэвтэр биш үү. 
Харин ч эсрэгээрээ эмэгтэй хүний хувьд охины ирээдүйг бодолцон гэмтлийг нь эмчилнэ, сорвийг нь арилгуулна гэж хэлээд зогсож байх ёстой биш үү. Долоон автомашины жолоочид 82 сая төгрөгийг өгч амыг нь хаасан. Энэ өөр. Техникийг засаж, янзалж шинэ мэт болгож болно. Харин өсөж яваа бяцхан охины хөлийн сорви насан туршид нь хар толбо болон үлдэнэ. Сэтгэлийнх нь сэвийг ч бодсон, охиныг эрүүл саруул болгоход сэтгэл тавих ёстой атал автомашинаас ч дор үзэж буй нь Ч.Маралмаад хүн чанарын өчүүхэн ч болов хэлтэрхий бий эсэхэд эргэлзэхэд хүргэж байна.