Хөгжлийн банкны асуудлаарх сонсгол Төрийн ордонд өнөөдөр тавдахь  өдрөө үргэлжилж байна. Монполимет групп “Монцемент” төсөлд олгосон зээлийн нотлох баримтыг шинжлэн судлах сонсголд Монполимет группийг үүсгэн байгуулагч, УИХ-ын гишүүн асан Ц.Гарамжав гэрчээр дуудагдаж, УИХ-ын гишүүдийн асуултад хариуллаа.  Монполимет групп “Монцемент” төсөлд 65 сая ам.доллар буюу 186.2 тэрбум төгрөгийн зээл авчээ. 

УИХ-ын гишүүн Ж.Сүхбаатар: Зээлийн үлдэгдлээ хэзээ, хэрхэн төлөхөөр байгаа вэ?

Ц.Гарамжав "Сонсголын ач холбогдол нийгэмд их байна. Юуны өмнө хар, цагаанаа ялгуулмаар байгаа юм. Зээл аваад бид үрсэн үү, зөрчил гаргасан уу, чин сэтгэлээсээ бүтээн байгуулалт хийсэн үү гэдгээ ялгуулмаар байна. Монцемент бол манай нэг л хэрэгжсэн төсөл. Сүүлийн 30 жил цементийн гурван цогц үйлдвэрийг ашиглалтад оруултал манай хамт олон төслөө хэрэгжүүлж чадсан. Манай компани 2014 оны аравдугаар сард анхны санхүүжилтээ Хөгжлийн Банкнаас авснаас хойш жилийн хугацаанд зургаан удаа тасалж өгсөн. Зээлийн хэрэгжилт болон зарцуулалтын тухайд гэвэл Хөгжлийн Банк Монполимет группэд хатуугийн хатуу шалгалт хийсэн. Хамгийн наашгүй нөхцөлөөр уулзалт явж байсан. Би Монцемент төслийнхөө хэрэгжилтийг 200 хувь гэж бардам хэлнэ. Бид Хөгжлийн Банкны зээлийг 100 хувь зориулалтын дагуу зарцуулсан. Монгол Улсыг цементийн хараат байдлаас гаргаж чадсан төсөл гэж хэлнэ. Тэгээд ч бид яагаад ханшийн эрсдэлийг хүлээн зөвшөөрч чадахгүй байгаа вэ. Мөнгөний бодлогыг тогтвортой барих ёстой Монголбанк, төр, засаг ханшийн алдагдлыг анхаарч үзэх ёстой байсан. Ингэж аж ахуйн нэгжид Монголбанкны буруутай бодлогоос үүссэн ханшийн алдагдлыг үүрүүлж, муу нэрийг нь зүүлгэх ёстой юм уу. Энэ төрийн зөв бодлого уу” гэв.