Улсын нэгдүгээр төв эмнэлгийн эмч нар Хөвсгөл аймгийн Нэгдсэн эмнэлгийн эмч, мэргэжилтнүүдтэй хамтран өмнө нь орон нутагт хийж байгаагүй урологийн есөн мэс заслыг амжилттай хийжээ.

Эмч нарын баг яаралтай тусламжийн хоёр мэс заслыг амжилттай хийж тус эмнэлгийн урологийн эрэгтэйчүүд, эмэгтэйчүүдийн бөөр, шээс дамжуулах замын мэс заслын болон эрэгтэйчүүдийн нөхөн үржихүйн эрхтний өвчин эмгэгийг оношилж, мэс заслын аргаар эмчлэн, орон нутагт урологи андрологийн тусламж үйлчилгээний нэр төрлийг нэмэгдүүлэхээр ажиллаж байгаа аж. 

Мэс заслын багт УНТЭ-ийн Урологи, андрологийн төвийн тэргүүлэх зэргийн эмч П.Мягмарсүрэн, урологийн эмч У.Түвшинтөгөлдөр, Б.Батхүү, болон  Хөвсгөл аймгийн Нэгдсэн эмнэлгийн урологи, андрологийн эмч Б.Мөнхжаргал, Мэдээгүйжүүлгийн эмч Э.Лхагважаргал, мэдээгүйжүүлэг, мэс заслын сувилагч нар ажиллажээ.

Эрүүл мэндийн тусламж үйлчилгээг нэг газарт төвлөрүүлэх нь иргэдэд чирэгдэл учруулж, дараалал үүсгэдэг бөгөөд энэ хугацаанд өвчлөл хүндрэх эрсдэл цөөнгүй тохиолддог. Тиймээс 2020 оноос эхлэн ЭМЯ-ны дэргэдэх “Урологи-андрологийн салбар зөвлөл”-өөс тусламж, үйлчилгээг сайжруулж, төвлөрлийг бууруулах зорилгоор 15 аймагт бөөрний дуранг суурилуулан, найман төрлийн мэс засал, дөрвөн төрлийн оношилгоог хийх бүрэн боломжийг бүрдүүлсэн байна.