Олон улсын жүдо бөхийн холбооны 2024 оны цуврал тэмцээний салхийг хагалсан Португалын гранпри өндөрлөлөө. Олимпын жилд зохион байгуулж буй гэдгээрээ өрсөлдөөнтэй, оролцогч олонтой гранпри байв. Тодруулбал, 90 орны 624 жүдоч барилдсан нь гранпри ангиллын тэмцээний хувьд дээд үзүүлэлт юм. Оросууд энэ тэмцээнд амжилтаар тэргүүлсэн ч тэднийг медалийн хүснэгтэд эрэмбэлдэггүй. Оросыг эс тооцвол долоон орон алтан медальтай нутаг буцсан. Харин 21 орны жүдочид ямар нэгэн байдлаар медалийн тавцанд зогссон байна. Манай улсаас 14 тамирчин зодоглож, хоёр хүрэл медальтайгаар энэхүү тэмцээнийг дуусгасан. Гавьяат тамирчин Л.Энхрийлэн сугалаанд орсон ч тодорхой шалтгааны улмаас гранприг өнжсөн бол олон улсын хэмжээний мастер Л.Сосорбарам хамтарсан бэлтгэлийн үеэр бага зэрэг гэмтэл авснаар уг тэмцээнд барилдсангүй.

Эмэгтэйчүүдийн 48 кг-д олон улсын хэмжээний мастер Г.Наранцэцэг “С” хэсгийг тэргүүлэн барилдахдаа Израйль, Колумбын тамирчныг ялсан ч шөвгийн наймд Улаанбаатарын “Их дуулга”, өсвөр, залуучуудын ДАШТ, Универсиад наадам, Варшавын нээлттэй тэмцээний алтан медальт Японы Хикари Ёшиокад ялагдав. Улмаар дагах барилдаанд Сербийн хүчтэй өрсөлдөгч Андрей Стаядиновыг, хүрлийн төлөө БНАСАУ-ын тамирчин Су Сон Жоныг ялснаар шагналын тавцанд зогсох эрхтэй болсон.

Тэгвэл -100 кг-д олон улсын хэмжээний мастер Б.Гончигсүрэн эхний хоёр тойрогт хийлж, улмаар Германыг ялсан ч шөвгийн наймд дэлхийн хошой аварга, Испанийн Николоз Шеразадашвилид ялагдсан. Ингээд дагах барилдаанд Киприйн Кроуссаниотакисыг, хүрлийн төлөө Японы Кэйто Грийнийг буулган авсан юм. Түүний хувьд гранпри ангиллын тэмцээнээс хоёр дахь медалиа авч байгаа нь энэ. Өнгөрсөн жил тэрбээр Душанбегийн гранпригаас хүрэл медаль хүртсэн билээ.

Монголчуудын оролцох дараагийн тэмцээн Парисын “Их дуулга” байх болно. Тус тэмцээн ирэх сарын 3-нд эхэлнэ.