Байгуулагдаад нэг жил болж байгаа Эдийн засаг хөгжлийн яам дэргэдээ Гадаадын хөрөнгө оруулалтын агентлагтай.  Үүнээс урд өмнө Засгийн газрын бүтцэд байсан агентлаг яам бараадсан. Чухамдаа өнөөдрийн гадаадын хөрөнгө оруулалтын хуулийг эл агентлаг фокусалж байгаа. 
Тэгвэл Ерөнхий сайд Л.Оюун-Эрдэнэ Засгийн газрын 200 дахь хоног дээрээ 100 мега төсөлд хөрөнгө оруулагч татахаа амлаж байсан. Энэ амлалтаа хэрэгжүүлэхийн тулд эхний ээлжинд хууль эрх зүйн орчноо сайжруулах нэн шаардлагатай тулгарсан. Ингээд жилийн турш боловсруулсан “хөрөнгө оруулалтын хууль”-ийг Эдийн засаг хөгжлийн яамны сайд Ч.Хүрэлбаатар батлуулахаар УИХ-аар ярьж эхэлсэн. Харамсалтай нь Х.Баттулга Ч.Хүрэлбаатар нарын хувийн улс төрөөс болж Монголд нэн шаардлагатай байгаа хөрөнгө оруулалтын хууль нягтлах, батлах ажилд саад үүссэн. Өөрөөр хэлбэл хөрөнгө оруулалтын хуулийг батлуулах гэж нэг нь чичирч, нөгөө нь татгалзаж Орос, Хятадын оролцоотой гэх утгаар талцуулсан нь байж боломгүй зүйл. Угтаа бол энэ улс Оросоос ч, Хятадаас ч хараат ардчилсан улс учир хуулийг хэлэлцэх асуудалд хоёрдогч орны асуудал төдийлөн чухал биш юм. 
 Хөрөнгө оруулалтын хуулийг ахин нягтлах нь батлахаасаа эсвэл эсэргүүцэхээс илүүтэй чухал байна. Тухайлбал  уг хуульд 
•    Хөрөнгө оруулагчдын эрх ашгийг хамгаалах, дэмжих, төр, хувийн хэвшлийн хэлцлийн механизмыг идэвхжүүлэх, төрийн байгууллага хооронд үүсэж буй чиг үүргийн давхцлыг арилгах
•    Гомдол, маргаан шийдвэрлэх явцыг хялбаршуулж, төрийн талаас хариуцах байгууллагын чадавхийг нэмэгдүүлэх
•    Төрийн хяналт шалгалт хийх эрх бүхий байгууллагуудын чиг үүргийн давхцлыг арилгах, шалгалтын үйл ажиллагааг хөрөнгө оруулагчид хүндрэл, бэрхшээл учруулахгүй хэлбэрээр зохион байгуулах
•    Татварын болон татварын бус дэмжлэгийг тодорхой болгох
•    Гадаадын болон дотоодын хөрөнгө оруулагчдыг ялгаварласан заалтуудыг арилгах
•    Дампуурах үе шатыг олон улсын стандартад нийцүүлэн журамлах, ингэснээр Монгол Улсад компаниа орхиод гардаг чанаргүй олон хөрөнгө оруулалтыг цэгцлэх
•    Зах зээл онилсон дэмжлэг, сурталчилгааг хөгжүүлэх, Монгол Улсаас гадаад улсад суугаа Элчин сайдын яамд, дипломат төлөөлөгчийн газруудын бүтэц, чиг үүрэгт гадаадын хөрөнгө оруулалтыг татах, хамгаалах, дэмжих, дорвитой арга хэмжээ авах талаар үүрэгжүүлэх, тодорхой зохицуулалтыг бий болгох
•     Хөрөнгө оруулагчдад зориулсан нэг цэгийн үйлчилгээний төв, цахим нэг цонхны үйлчилгээний хууль, эрх зүйн зохицуулалтыг бий болгож, үйл ажиллагааг тогтворжуулах  гэх мэт асуудлуудыг хэрхэн зохицуулсан, ямар гарц шийдэл буйг даруй хэлэлцэх нь чухал юм. Түүнээс биш хэн нэгэн улс төрчийн хувийн амбиц хуулийг хэлэлцэхэд нөлөөлөөд байж болохгүй.  Товчхондоо Орос Хятадаас гадна өөр олон орны хөрөнгө оруулагчдыг татах боломжийг ганцхан заалт, хариугүй улс төржилтөөр үгүйсгэж болохгүй.