Узбекистаны нийслэл Ташкент хотод хүндийн өргөлтийн насанд хүрэгчдийн Ази тивийн аварга шалгаруулах тэмцээн маргааш эхэлнэ. 12 хоног үргэлжлэх тус тэмцээн “Парис-2024” зуны олимпын наадмын эрхийн оноо олгохоороо онцлогтой. Энэхүү тэмцээнд манай улсаас гавьяат дасгалжуулагч Ц.Хосбаяр, дасгалжуулагч Б.Дэнсмаа нарын удирдлага дор 14 тамирчин өрсөлдөхөөр Узбекистаныг зорилоо.

Бүрэлдэхүүнд эмэгтэйчүүдийн 49 кг-ын жинд Б.Тунгалаг, 59 кг-д Азийн аваргын мөнгө, хүрэл медальт Э.Энхтамир, 64 кг-д Азийн аварга Г.Ануужин, спортын мастер Б.Хонгорзул, 71 кг-д залуучуудын дэлхийн аваргын хүрэл, өсвөрийн Азийн аваргын алт, мөнгө, хүрэл медальт О.Төгс-Эрдэнэ, спортын мастер А.Содгэрэл, 81 кг-д дэлхийн аварга, дэлхийн аваргын хошой мөнгө, нэг хүрэл медальт, дэлхийн цомын аварга, Азийн аварга, гавьяат тамирчин М.Анхцэцэг, -87 кг-д А.Баясгалан нар өрсөлдөнө. Харин эрэгтэйчүүдийн 61 кг-д М.Очир-Эрдэнэ, 67 кг-д А.Ананд, Э.Дүүрэнжаргал, 81 кг-д С.Цэнгүм, 96 кг-д Б.Цолмон, +109 кг-д М.Бахберген нар хүч үзэхээр бэлтгэл сургуулилтаа базаажээ.

Хүндийг өргөлтийнхнийг Узбекистаныг зорихын өмнө Олимпод бэлтгэх баг тамирчдын сургалт, дасгалжуулалтыг дэмжих багийн ахлагч, Хөдөлмөрийн баатар, Ардын багш, гавьяат дасгалжуулагч Ч.Насантогтох бэлтгэл сургуулилттай нь танилцаж, спортын талбарт шинэ түүхийг бүтээж, өндөр амжилт гаргахыг ерөөлөө.

Монголын хүндийг өргөлтийн тамирчид насанд хүрэгчдийн Азийн аварга шалгаруулах тэмцээнээс есөн алт, 33 мөнгө, 65 хүрэл (эмэгтэйчүүд зургаан алт, 14 мөнгө, 28 хүрэл, эрэгтэйчүүд гурван алт, 19 мөнгө 37 хүрэл ) медаль хүртэж байв.