Дэлхийн хамгийн том электрон спортын байгууллага болох ESL-ээс жил бүр зохиодог CSGO-ын хамгийн том лиг "ESL Pro League"-ын 17-р улирлын сонгон шалгаруулалт үргэлжилж байна.
Энэхүү лигийн тэмжээнд Ази тивийг төлөөлж оролцох сонгон шалгаруулалтад Монголын "IHC Esports баг" оролцож Хятадын "Lynn Vision" багийг 2-1 харьцаагаар хожиж эрхээ авлаа. 
Багийн гарааны тоглогч kabal буюу Б.Бат-Энх амралтаа авсан хойгуур сэлгээний тоглогч Bart4k буюу Б.Баатархүү тоглож Blitz буюу Б.Гарьдмагнай, Techno4K буюу М.Содбаяр, sk0R буюу Б.Тэнгис, ANNIHILATION буюу Н.Түвшинтөгс нарын хамтаар ирэх сараас дэлхийн шилдэг 24 багийн нэгээр сонгогдож Европыг зорих боллоо. 
"ESL Pro League Season 17" Мальт улсад хоёрдугаар сарын 22-оос гуравдугаар сарын 26-ны хооронд нэг сарын турш үргэлжилнэ. Лигт "FaZe Clan", "G2 Esports", "Heroic", "Team Liquid" зэрэг дэлхийн аваргууд хүч үзэх болно.