Өнгөрсөн тэмцээнд түрүүлсэн ёкозүна Тэрүнофүжи нурууны гэмтлийн улмаас Хаврын тэмцээнийг өнөөдрөөс орхиж байна. Аварга энэ тэмцээний дөрөв дэх өдрөөс эхлэн маэгашира цолтнуудад 3 дараалан ялагдаж, 3 кинбоши алдсан. Ёкозүна цолтон эхний 6 өдөрт 4 унаж байсан тохиолдол өмнө нь 1966 оны Кюүшюү башёд ёкозүна Точинокайгаас хойш 58 жилийн дараа тохиож байгаа юм. Түүний багш Исэгахама ояката сэтгүүлчдийн асуултад хариуллаа.

Аварга өвдөгний гэмтлээ сэдрээсэн үү?
Үгүй, нуруу. Хүч ер гарахгүй байна гэж хэлсэн. Сэтгэл санаагаа чангалаад барилд гэж хэлсэн ч болохгүй нь гэж байсан.
Бага багаар муудав уу, эсвэл гэмтэв үү?
Угаасаа байдал муу байсан. Тийм болохоор бэлтгэл хийж чадаагүй. Их өвддөг. Өнгөрсөн тэмцээний үеийнхээс муу байсан. Чадах бүхнээ хийсэн ч болсонгүй. 
Нэгдүгээр сарын тэмцээний ядаргаа гараагүй юм болов уу?
Ядаргаа хуримтлагдсан байгаа. Гэмтлээ эдгээх, бэлтгэл хийх гээд манай бөх хамаг чадлаараа хичээн зүтгэж байгаа. 
Цаашдаа яах вэ?
Тойргийн барилдаан хүртэл бэртлээ гайгүй болгох тал дээр ажиллана. Ядаж дохёнд гарах ёслол хийж чаддаг болох хэрэгтэй байна. Дасгал сургууль хийж, булчин нэмэгдүүлэхээс өөр арга алга. Ингэж байж өвчин нь дарагдвал ч...
Мэс засал хийлгэх үү?
Хагалгаанд орчихвол эсрэгээрээ барилдаж чадахгүй болно. Эдгээх цаг гарахгүй. Дахиад ясны хэлтэрхий илэрвэл авахаас өөр аргагүй болно. Маш хэцүү байдалтай байгаа. 
Зуны тэмцээнд барилдах уу?
Мэдээж барилдахын төлөө ажиллана.