Прокурорын байгууллага өнгөрсөн долоо хоногт буюу нэгдүгээр сарын 16-наас 20-ны өдрүүдэд мөрдөн байцаалтын 2041 хэрэгт хяналт тавин ажиллажээ. Хяналтын ажлын явцад мөрдөгч болон зөрчлийн хэрэг бүртгэх эрх бүхий албан тушаалтанд тодорхой ажиллагаа гүйцэтгүүлэхээр 547 даалгавар бичгээр өгч, гэмт хэрэг, зөрчил гарахад нөлөөлсөн шалтгаан, нөхцлийг арилгуулахаар байгууллага, албан тушаалтанд 10 мэдэгдэл хүргүүлжээ. Эрүүл мэндийн халдашгүй байдлын эсрэг 105, өмчлөх эрхийн эсрэг 68, хөдөлгөөний аюулгүй байдал, тээврийн хэрэгслийн ашиглалтын журмын эсрэг 23, авлига албан тушаалын 9, хүрээлэн байгаа орчны эсрэг 8, бэлгийн эрх чөлөө халдашгүй байдлын эсрэг 6, мансууруулах эм, сэтгэцэд нөлөөт бодисыг хууль бусаар ашиглах 2, цэргийн албанаас оргон зайлах, Монгол улсын хилийг хууль бусаар нэвтрэх тус бүр 1, нийт 233 хэрэгт яллах дүгнэлт үйлдэн шүүхэд шилжүүлж шийдвэрлэжээ. 
 

Яллах дүгнэлт үйлдэн шүүхэд шилжүүлсэн: 
Хөвсгөл аймгийн Чандмань-Өндөр сумын Нийгмийн даатгалын байцаагчаар ажиллаж байсан М нь эрх мэдэл, албан тушаалын байдлаа урвуулан ашиглаж тус сумын тэтгэвэр тогтоогдоогүй 38 иргэнд тэтгэвэр олгож, бусдад давуу байдал бий болгосон гэх хэрэгт Эрүүгийн хуулийн 22.1 дүгээр зүйлийн 2-т зааснаар яллах дүгнэлт үйлдэн Хөвсгөл аймаг дахь Сум дундын Эрүүгийн хэргийн анхан шатны шүүхэд,
Зэвсэгт хүчний 167 дугаар ангийн Мото буудлагын ротын захиаргчаар ажиллаж байсан Б.Б, Артиллерийн батарейны ахлах ахлагч Д.Б, Холбооны зангилгааны радио холбооны тасгийн Р-140 станцын хоёрдугаар тоотын станцын дарга, ахлах ахлагч Б.Э нар нь эрх мэдэл, албан тушаалаа урвуулан ашиглаж, тус цэргийн албан хаагчдыг цэргийн ангиас зохих зөвшөөрөлгүй нууцаар гаргаж, Өмнөговь аймгийн Даланзадгад суманд баригдаж байгаа 15 давхар барилга дээр ажиллуулсан байна. Үүнийг Өмнөговь аймаг дахь сум дундын Эрүүгийн хэргийн анхан шатны шүүхэд шилжүүлжээ.