Төв талбайд нүүрсний хулгайчдын эсрэг 20 гаруй хоног жагсаж, үзэл бодлоо илэрхийлсэн тэмцэгч залуус аргаа өөрчилж, төрийн байгууллагуудад шаардлага хүргүүлж, тэр дор нь хариу өгөхийг шаардаж эхэлсэн. 
Монголоо буюу Б.Бат-Очир тэргүүний 20 гаруй залуус  анх ХЭҮК-т очин хүний эрхийн асуудлаар хандсан бол өчигдөр МҮОНРТ-д очин таван зүйл бүхий шаардлагыг мөн хүргүүлсэн билээ. Учир нь, олон нийтийн статустай, татвар төлөгчдийн мөнгөөр санхүүждэг тус байгууллага тэмцэгчдийн дуу хоолойг олонд хүргэх гол үүргээ биелүүлээгүй хэмээн залуус бухимдаж, энэ бүхнээ залруулахыг хүссэн билээ. 
Харин тэд өнөөдөр Цагдаагийн ерөнхий газарт очиж, дарга, удирдлагуудад нь ээлжит шаардлагаа хүргүүлнэ. Үндсэн хуулиар олгосон жагсаж, цуглах эрхийг нь ноцтой зөрчиж байгаад тэд эсэргүүцэн, ийнхүү ЦЕГ-ын даргад өнөөдөр, харин маргааш Хууль зүй, дотоод хэргийн сайд Х.Нямбаатар дээр очиж, ээлжит шаардлага, эсэргүүцлийн бичгээ барихаар болсон байна.