Нийслэлийн Баянзүрх дүүргийн 26 дугаар хороо, “Дүнжингарав” худалдааны төвийн ойролцоох замд осол гарч хүнд даацын автомашинд тээвэрлэж явсан шингэрүүлсэн хий дэлбэрсэн. Дэлбэрэлтийн улмаас тухайн орчинд явганаар болон тээврийн хэрэгслээр зорчиж явсан дөрвөн иргэн, галыг унтраахаар очсон онцгой байдлын байгууллагын гурван албан хаагч амиа алдсан.
Мөн тэр хавийн орон сууц галд өртөж, оршин суугчид эд, хөрөнгөөрөө хохироод буй. Энэ осол гарснаас хойш сар гаруйн хугацаа өнгөрчээ.
Улсын Онцгой Комиссоос өдөр бүр мэдээлэл хийж байгаа. Өнөөдрийн хурлын үеэр УОК-ын нарийн бичгийн дарга, хурандаа Т.Баярхүү “Осол, хэргийг цагдаагийн байгууллага шалгаж байгаа. Цагдаа, прокурорын нэгдсэн ажлын хэсгээс хэрэг шалгах ажиллагааг үргэлжлүүлж байна. Хэд хэдэн шинжээчийн дүгнэлтүүд гарсан. Хохирол тогтоох ажиллагаанууд үргэлжлээд явж байна. Мөн БХБ-ын сайдын тушаалаар орон сууцыг цаашид ашиглаж болох эсэхийг судалж, дүгнэх ажлын хэсэг гарсан байгаа. Ажлын явц 90 хувьтай байна.
УОК-ын даргын тушаалаар мөн ажлын хэсэг байгуулагдсан. Улсын хэмжээнд үйл ажиллагаа явуулж байгаа ШТС-ууд болон хийгээр цэнэглэх станцуудын шалгаж байна, дүгнэлт дөрөвдүгээр сарын 1-нд гарна” гэлээ.