Хөгжлийн банкны 80 хүн, 4 хуулийн этгээдэд холбогдох эрүүгийн хэргийн давж заалдах шүүх 14 хоногийн хугацаанд үргэлжилж, шийдвэрээ өнөөдөр /2024.03.22/ 15.00 цагт танилцууллаа.

УИХ-ын дөрвөн гишүүний холбогдсон хэргийг дараах байдлаар шийдвэрлэв. Тухайлбал УИХ-ын гишүүн Н.Алтанхуяг, "Фортуна" Н.Батбаяр нарыг цагаатгасан шийдвэрийг хэвээр үлдээжээ. Н.Алтанхуягийн хувьд Засгийн газартай холбоотой шийдвэрийг шүүх хянах гэмт хэрэг үйлдсэн гэдгийг нь тогтоох боломжгүй гэж үзлээ. Харин Н.Батбаярын хувьд хэргийн хөөн хэлэлцэх хугацаа нь дууссан учраас цагаатгасан гэж тайлбарлалаа.
Харин УИХ-ын гишүүн Ё.Баатарбилэгт холбогдох хэргийг дахин хэлэлцэх шаардлагатай гэж үзэж, анхан шатны шүүхийн шийдвэрийг бүхэлд нь хүчингүй болгов. Учир нь, үндэслэлгүй хөрөнгөжсөнийг нарийвчилсан байдлаар дүгнээгүй, зээл нь байр худалдаж авахад цаг хугацаа нь таарч байгааг шалгаж, дүгнэх шаардлагатай. Анхан шатны шүүхээс түүнд ЗУРГААН жилийн хорих ял оноосон билээ. УИХ-ын гишүүн Х.Ганхуяг, Г.Амартүвшин нарт холбогдох хэргийг цагаатгасан шийдвэрийг хэвээр үлдээсэн болохыг шүүхээс танилцуулав.

Жилийн турш олны анхаарал татсан “Хөгжлийн банк”-ны хэрэг ийнхүү замхарч, улс төрийн гол тоглогчид нь цагаатаж, ял авсан ганц гишүүн нь хэргээ анхан шатны шүүх рүү буцаалгаж чадлаа. Улс төрчдийн дөрвөн жил тогоон дотроо бужигнасан хэрэг эцсийн бүлэгтээ арьс арьсаа хамгаалах тактик болж хувирснаар жүжиг төгслөө.