МАН-ын бага хурал өнөөдөр /2024.03.23/ 11.00 цагаас Тусгаар тогтнолын ордонд хуралдаж байна. Тус хуралдаанаар 2024 оны УИХ-ын ээлжит сонгуульд оролцох тухай,  МАН-аас нэр дэвшүүлэх мөрийн хөтөлбөр батлах, сонгуульд нэр дэвшүүлэх, санал хураах, дүн гаргах журам батлах болон бусад асуудлыг хэлэлцэхээр товложээ. 

УИХ-ын гишүүн, Эдийн засаг, хөгжлийн сайд Ч.Хүрэлбаатар: Засгийн газрын үйл ажиллагааны 2020-2024 оны хөтөлбөрийн хэрэгжилтийг УИХ хэлэлцсэн. Засгийн газар өөрсдөдөө 74 хувийн үнэлгээ өгсөн. Харин Үндэсний аудитын газар 70 хувийн үнэлгээ өгсөн байгаа. Цар тахал, дайны нөхцөл байдалтай тулгарч байсныг та бүхэн мэдэж байгаа. Өнөөдөр МАН-ын бага хурлаар 2024-2028 оны сонгуулийн мөрийн хөтөлбөрийн талаар ярина. 2023 оны эцсийн байдлаар өрхийн бодит орлого 14 хувиар нэмэгдсэн. Ард иргэдтэй уулзаж санал авч байхад өрхийн бодит орлого, хөдөө аж ахуйн гаралтай түүхий эдийн үнийг яаж нэмэгдүүлэх вэ, яаж ажилтай, орлоготой байх вэ гэдэг асуудлыг ярьж байгаа. Мөн нийгэмд шударга ёс тогтоох тухай их ярьж байна. Ард иргэд “авлигын хэрэгт холбогдсон хүмүүст яагаад хариуцлага тооцохгүй байна вэ. Шүүх дээр хэрэг нь яагаад шийдэгдэхгүй байна вэ” гэдгийг их асууж байгаа. Манай намын дүрэмд авлига, албан тушаалын хэрэгт холбогдсон хүнийг нэр дэвшүүлэхгүй гэсэн заалт бий.