Авлигатай тэмцэх газраас “Нүүрсний” хэрэгт холбогдогчдын хэргийг эрчимтэй мөрдөн шалгажээ. Тухайлбал, ажлын хэсэг мөрдөн шалгах ажиллагаагаар 118 объектод нэгжлэг хийн, хүний бие, эд зүйл баримт бичигт үзлэг хийх ажиллагааг 216 удаа,  гэрчээр 326 хүнээс мэдүүлэг авч, 593 баримт материал холбогдох байгууллагаас гаргуулан авч, мөрдөн шалгах ажиллагааг явуулжээ.  

Энэ хугацаанд 21 хүнийг хойшлуулшгүйгээр баривчилж, шүүхэд танилцуулсан байна. Мөрдөн шалгах ажиллагааны явцад нийт 64 иргэн, албан тушаалтанд эрүүгийн хэрэг үүсгэн, яллагдагчаар татжээ.  

Үүний 14 албан тушаалтныг эрх мэдэл, албан тушаалаа урвуулан давуу байдал олгож, хохирол учруулсан, 14 албан тушаалтныг хахууль авах, 24 иргэн, албан тушаалтныг хахууль өгөх, 12 албан тушаалтныг мөнгө угаах, үндэслэлгүйгээр хөрөнгөжих гэмт хэрэгт эрүүгийн хэрэг үүсгэж, яллагдагчаар татсан байна. 

Яллагдагчдыг албан тушаалаар нь авч үзвэл, нийтийн албан тушаалтан 35, үүнд, улс төрд нөлөө бүхий этгээд УИХ-ын гишүүн нэг, Зам, тээврийн хөгжлийн сайд нэг, Төрийн нарийн бичгийн дарга нэг, Засаг дарга нэг, УИХ-ын гишүүний зөвлөх нэг, гаалийн улсын байцаагч 12, ХХЕГ-ын харъяа байгууллагын ажилтан дөрөв, боомтын захиргааны ажилтан нэг, “Эрдэнэс Тавантолгой” ХК-ийн зургаан албан тушаалтан, “Тавантолгой төмөр зам” ХХК-ийн албан тушаалтан гурав, жирийн иргэн 19 хүн байна. 

Энэ удаагийнх нүүрсний 17 хулгайчийг зарлахаас өмнөх мөрдөн шалгах ажиллагааны тоон мэдээлэл бөгөөд өдгөө УИХ-ын долоон гишүүн, албан тушаалтнуудад холбогдох хэргийн мөрдөн шалгах ажиллагаа ид үргэлжилж байгаа юм.