Монгол улсын Ерөнхий сайд Л.Оюун-Эрдэнэ “Улаанбаатараас ярьж байна” нэвтрүүлэгт оролцож, ерөнхийлөгч асан Ц.Элбэгдоржийн хэд хэдэн ноцтой үйлдлийг дурдаж ярилцлага өгсөн. Тиймээс ч  экс ерөнхийлөгч дуучин Rokitbay-ийн “Blaavgai” дууг постлон хариуг нь барив.

Ямартай ч улс төрийн хүрээнд Х.Баттулгатай хамтраад буй гэх Л.Оюун-Эрдэний хаврын улс төр Ц.Элбэгдоржийг чиглэх нь баттай. Өөрөөр хэлбэл  Ц.Элбэгдоржийн ардчилсан нам дахь фракц, Л.Оюун-Эрдэний Засгийн газарт хавдар үүсгээд байгааг бултаараа харж байна.  Тодруулбал “Эрдэнэт”-ийн 49 хувь, С.Зоригийн үхэл, МАН-ын хуваагдал, Н.Энхбаярыг авлигын хэргээр шүүхээс ялласны ард АН болон Ц.Элбэгдорж байсан талаар Ерөнхий сайд “Би худлаа хэлэхгүй” гэх тодотголтойгоор онцлон дурдсан. Тэгвэл “Улаанбаатараас ярьж байна” нэвтрүүлгийн агуулгаас харахад “С.Зоригийн харамсалтай хэрэгт Н.Багабанди, Ц.Элбэгдорж нарын ойлголцолгүй байдал, улс төрийн буруу үлгэр дуурайлал томоохон нөлөө үзүүлсэн” гэх зураглал үүсээд буй. Үнэхээр ч эдгээр хэргүүдэд Ц.Элбэгдорж хамааралтай юу? Эсвэл Л.Оюун-Эрдэнэ ахиад л нохой шуугиулаад эхэлсэн үү гэх асуултууд хариултгүй хэвээр байна.

Товчилбол МАН УИХ-ын сонгууль бүрийн өмнө С.Зоригийн хэргээр улс төр хийж, сөрөг хүчнээ намнасны хариуд найман жил үнэмлэхүй засагласан. Тиймээс эл хэргүүд бол МАН-ын сонгуулийн дархан мэх билээ. 

Гэвч Ц.Элбэгдорж болоод түүний ардчилсан нам тийм цэвэрхэн сөрөг хүчин бус. Эрдэнэтийн 49 хувийн асуудалд МАНАН үүсгэж оролцсон, Тавантолгой, Оюутолгойд оролцоотой явж ирсэн нь ч баримтаар нотлогддог. 
Хэн хэн нь бохир улс төр хийж ирсэн Ц.Элбэгдорж, Л. Оюун-Эрдэнэ нарын энэ хаврын улс төрийн дисс эхэллээ.  Байдал цаашид улам хурцдаж, Л.Оюун-Эрдэний Засгийн газрын мөрийн хөтөлбөрийн хэрэгжилт, уул уурхай, байгаль орчин, нийслэлийн бохир схемүүд илчлэгдэх талаар ойрын эх сурвалж онцоллоо.